پەیامنێری ئێن ئاڕ تی رایگەیاند، سێ موشەک ئاڕاستەی بنکەیەکی سەربازی تورکیا لە ناحیەی زێلکان کرا و تاوەکو ئێستا زیانەکانی دیار نین.

تائیف گۆران پەیامنێری ئێن ئاڕ تی رایگەیاند، موشەکەکان لە شوێنێکی نزیکەوە ئاڕاستەی بنکە سەربازییەکە کراون، کە کەمتر لە ١٥ کیلۆمەتر لە نێوان شوێنی ئاڕاستەکردنەکە و بنکە سەربازییەکەدا هەیە.

وتیشی، هیچ موشەکێک بەر بنکە سەربازییەکە نەکەوتووە و دووانیان لە پشتی بنکەکە کەوتوونەتەوە. باسی لەوەشکرد، تاوەکو ئێستا زیانەکانی دیار نین.

ئەوەشی خستەڕوو، موشەکەکان لە چوارڕیانی عەزاوی لە ناحیەی باشیکی سەر بە پارێزگای نەینەواوە ئاڕاستە کراون و سەرجەمیان لە دەوروبەری بنکەکە کەوتوونەتەوە.

راشیگەیاند، لە ئێستادا دەست بە لێکۆڵینەوە کراوە لە رووداوەکە و دەست بەسەر ئەو ئۆتۆمبێلەشدا گیراوە کە موشەکەکانی لێوە هەڵدراوە.

تورکیا نزیکەی ٤٠ بنکەی سەربازی لە سنوری پارێزگای دهۆکدا هەیە و لە دوای ساڵی ٢٠١٥ـەوە؛ بە بیانووی بوونی چەکدارانی پەکەکە لە ناوچەکە بنکەی سەربازی خۆی لە ناحیەی باشیک دانا.

هاوکات، ئەو بنکانەش چەندین جار رووبەڕووی ئاڕاستەکردنی موشەک و هێرش دەبنەوە و دواین جاریش دوو شەو بەر لە ئێستا و لە شەوی سەری ساڵدا بنکەیەکی دیکەیان بۆردومان کرا.