ئیفلاسی سیاسی
PM:01:45:31/12/2025
956 جار خوێندراوەتەوە
بەشدار هەمزە
+
-
کاتێک حیزب ماڵی
خۆی وێران دەکات و بۆ ماڵی دراوسێ دەجەنگێت
بازرگانانی پۆست:
لە پەکخستنی ناوخۆوە بۆ پاوانخوازی لە بەغدا
سیاسەتی کوردی
گەیشتووەتە ترۆپکی "دژپێکی". زیاتر لە ساڵێکە خەڵکی کوردستان چاوەڕوانی
تێپەڕاندنی قەیرانەکانن، کەچی لایەنە دەسەڵاتدارەکان لە ناوخۆدا پەرلەمانیان کردووەتە
قوربانی بەرژەوەندییە حیزبییەکان و پڕۆسەی یاسادانانیان بە تەواوی "ئیفلیج"
کردووە، بەڵام هەمان ئەو لایەنانە لە بەغدا خەریکی جەنگێکی توندن بۆ بەدەستهێنانی
کورسییەک لە دەستەی سەرۆکایەتی پەرلەمان.
ئیفلیجکردنی
ناوخۆ: کاتێک دەنگدەر بێباک دەکرێت
لە هەرێمی
کوردستان، پەرلەمان کە دەبێت باڵاترین دەسەڵاتی یاسادانان و چاودێری بێت، لەلایەن
حیزبەکانەوە کراوەتە پەراوێز. ساڵێک تێدەپەڕێت و هێشتا نە سەرۆکایەتییەکەی دانراوە
و نە حکومەتێک هەیە متمانەی لێ وەربگرێت. ئەمە تەنها دواکەوتن نییە، بەڵکو "ڕسواکردنی"
ئەو دامەزراوەیەیە کە بڕیار بوو نوێنەری خەڵک بێت. کاتێک حیزبێک بڕوای بە پەرلەمانی
خۆی نەبێت، چۆن دەتوانێت باسی دیموکراسی و پاراستنی قەوارەی هەرێم بکات؟
مەزادخانەی بەغدا:
شەڕ بۆ پۆست، نەک بۆ ماف
جێگەی تێڕامان
و گاڵتەجاڕییە؛ ئەو حیزبانەی لە هەولێر پەرلەمانیان پەکخستووە، لە بەغدا خەریکی
"شەڕە کورسی"ن بۆ پۆستی جێگری دووەمی سەرۆکی پەرلەمان. ئەم کێبڕکێیە نیشانەی
ئەوەیە کە لای ئەوان "پۆست" لە "پرهنسیپ" گرنگترە. ئەگەر خەمی
ئەوان مافی کورد و قوت و بژێوی خەڵک بوایە، سەرەتا ماڵی خۆیان ڕێکدەخستەوە و پەرلەمانێکی
کارایان لە هەولێر بونیاد دەنا.
ئەنجام:
بازرگانی بە کات و ژیانی خەڵکەوە
ئەم حیزبانە بەم
ڕەفتارانەیان پەیامێکی ڕوون دەدەنە هاوڵاتیان: "یاسا و دامەزراوەکان لای ئێمە
تەنها ئامرازن بۆ دەسەڵات". کاتێک بەرژەوەندییان لە پەکخستنی پەرلەمانی
کوردستان بێت، پەکیشی دەخەن، و کاتێک بەرژەوەندییان لە پۆستێکی بەغدا بێت، هەموو پیرۆزییەکان
دەخەنە لاوە بۆ دەستکەوتنی.
کاتی ئەوە
هاتووە بپرسین: ئێوە کە پەرلەمانی بن دەستی خۆتان ڕسوا کردووە، بە چ ڕوویەکەوە شەڕی
پەرلەمانی عێراق دەکەن؟ ململانێی ئێوە لەسەر "پۆستە" نەک "پێگەی
کورد"، و قوربانی یەکەم و کۆتاییش تەنها هاوڵاتییانی ئەم هەرێمەن کە بوونەتە
بارمتەی حیزبگەراییەکی کوێر.
کورتەی کلام:
پەرلەمانی 'ئیفلیج'
لە هەولێر و 'شەڕە کورسی' لە بەغدا!