دووپاتیشی کردەوە لە بودجەی داهاتوودا نرخی دۆلار بە ١٣٠ هەزار دینار بۆ هەر ١٠٠ دۆلار دیاریکراوە، ئەمەش پەیامی سەقامگیری دراو و کارەکانی ئاڵوگۆڕی نەرم دەنێرێت.

ئاماژەی بەوەشکرد، ئەمە یارمەتیدەر بووە بۆ روونکردنەوە بۆ هاوڵاتیان کە بانکی ناوەندی لە نزیکەوە چاودێری دۆخەکە دەکات و دەیەوێت رێگری لە هەر بەرزبوونەوەی نرخی ئاڵوگۆڕ بکات، ئەمەش وای لە بانکەکە کرد کە وەزارەتی دارایی ئاگاداربکاتەوە، کە نرخی ئاڵوگۆڕ وەک خۆی دەمێنێتەوە و هیچ زیادکردنێکیش نابێت، ئەمەش بە پێچەوانەی ئەوەی هەندێک لە هەوڵی پێشنیارکردندان.

پێشتر بانکی ناوەندی عێراق سەبارەت بە نرخی فەرمی ئاڵوگۆڕی دۆلاری ئەمریکی، کە لە رەشنووسی یاسای بودجەی فیدراڵی بۆ ساڵی ٢٠٢٦، پەسەند دەکرێت، روونكردنەوەی ئاڕاستەی وەزارەتی دارایی كردبوو.

بەپێی روونكردنەوەكەی بانكی ناوەندی، نرخی فەرمی ئاڵوگۆڕی دراو، کە لە ساڵی ٢٠٢٦، پەسەند دەکرێت بە هەزار و ٣٠٠ دیناری عێراقی بۆ هەر دۆلارێکی ئەمریکییە.

ئەوەش هاتووە، ئەم رێژەیە لە شوباتی ٢٠٢٣ەوە کاری پێدەکرێت و دانانی ئەو رێژەیە دەکەوێتە ژێر دەسەڵاتی بانکی ناوەندی عێراقەوە.

بانکی ناوەندی بە رێژەی هەزار و ٣٠٠ دینار بۆ دۆلارێك لە وەزارەتی دارایی دەکڕێت و بە رێژەی هەزار و ٣١٠ دینار بە بانکەکان دەیفرۆشێت، کە دواتر بە هەزار و ٣٢٠ دینار بە بازرگانان و بۆ گواستنەوەی نێودەوڵەتی دەیفرۆشێت.