PM:06:43:28/12/2025
868 جار خوێندراوەتەوە
بەهۆی گۆڕانکارییەکانی کەشوهەوا و دەستپێکردنی بەفربارین، لایەنە پەیوەندیدارەکان هۆشداریی توند دەدەنە شۆفێران و هاوڵاتیان تاوەکو لە پێناو سەلامەتیی خۆیان، پابەندی رێنماییەکان بن.
ئەمڕۆ یەکشەممە ٢٨ـی کانونی یەکەمی ٢٠٢٥، لە ئێستادا لە بەشێک لە ناوچە شاخاوییەکانی سنووری پارێزگای سلێمانی بەفربارین دەستیپێکردووە و پێشبینی دەکرێت لە درەنگانی شەو، پلەکانی گەرما بە شێوەیەکی بەرچاو دابەزن، ئەمەش دەبێتە هۆی دروستبوونی شەختە و بەستن لەسەر شەقامەکاندا.
هاوکات هاتووچۆی
سلێمانی ئاگاداری بەپەلە بە شۆفێران دەدات و دەڵێت، "داوادەکەین هاووڵاتیان و
شۆفێران بۆ کاری ناچاری نەبێت سەردانی ناوچە شاخاوییەکان نەکەن، چونکە بەهۆی بەفر
و بەستنەوە رێگاکان مەترسیدار دەبن".
ئاماژەی بەوەشکردووە،
ئەو شۆفێرانەی لەسەر رێگاکانن، پێویستە بەوپەڕی وریاییەوە و بە خێراییەکی کەم
شۆفێری بکەن بۆ ئەوەی لە رووداوی نەخوازراو بەدوور بن و دڵنیاببنەوە لە کارکردنی
سیستمی گەرمکەرەوە و لایتەکانی ئۆتۆمبێل پێش بەکارهێنانی رێگاکان.
