لەوبارەیەوە، دارا سێکانیانی ئەندامی پەرلەمانی عێراق بە ئێن ئاڕ تی راگەیاند، لە ئێستادا شاندێکی هەرێم لە بەغدایە و گفتوگۆکان بەردەوامن بۆ چارەسەرکردنی گرفتەکان، حکومەتی عێراقیش سورە لەسەر ئەوەی موچەی هەرێم دەبێت لەسەر بنەمای ڕادەستکردنەوە داهاتی نانەوتی و خاڵە سنوورییەکان بێت.

هاوکات، غەریب عەسکەر ئەندامی پەرلەمانی عێراق باسی لەوە کرد، "کێشەی مووچە هونەرییە و داوا دەکەم لیژنەی هاوبەش پێکبهێنرێت، تاوەکو تەواوی گرفتەکان چارەسەربکرێن، مووچەخۆرانی هەرێمیش عێراقین و هەموولایەک دەبێت پابەندبن بە دابین کردنی مافەکانیان و مووچەکانیان.

سەرچاوەیەک لە وەزارەتی دارایی عێراق بە ئێن ئاڕتی ڕاگەیاند بە زوترینکات پڕۆسەی وربینی لە لیستی مووچە و دەرخستەی کۆتایی مانگانەی هەرێم بۆ مانگی تشرینی یەکەم دەستپێدەکات و ئەگەر کێشەو کەموکوڕیەکانی لیستی مووچە چارەسەر کرابوون و لیستەکە بێ کێشەبێت تەواوی مووچەی مانگی ١٠ی موچە خۆران دەخرێتە سەر هەژماری بانکی هەرێم.

ئێستا چاوەکان لەسەر ئەوەن، تاوەکو کۆتای ئەمساڵ هات و نەهاتی مووچە بە تەواوەتی کۆتای پێبێت، بەڵام ئەوەی تا ئێستا هەیە لە نێوان هەرێم و بەغدا هێشتا لێکتێنەگەشتن لەسەر چەند خاڵێک هەیە و پێدەچێت لە هەفتەکانی داهاتوشدا سەردانی شاندەکانی هەرێم بۆ بەغدا بەردەوام دەبێت.