PM:03:25:18/08/2024
720 جار خوێندراوەتەوە
لیژنەی ئاسایش و بەرگریی پەرلەمانی عێراق رایگەیاندووە، لە ئەنجامی بەردەوامی هەوڵەکانی بانکی ناوەندی و وەزارەتی ناوخۆ، لە ئێستادا ٨٠٪ـی هەوڵەکانی قاچاخچێتی دراو کۆنتڕۆڵ کراوە. دەشڵێت، "بەدیجیتاڵکردنی مامەڵە داراییەکان لە بانکەکانی عێراقدا، هۆکارێکە بۆ بەرزکردنەوەی سەقامگیری ئابووری و کەمکردنەوەی مەترسییەکانی قاچاخچێتی دراو لە وڵاتدا".
ئەمڕۆ یەکشەممە، لیژنەی ئاسایش و بەرگریی پەرلەمانی عێراق لە راگەیەنراوێکدا ئاماژەی بەوە کردووە، قاچاخچێتی دراو بە هەموو شێوەکانییەوە کاریگەری لەسەر ئابووری وڵات دروست دەکات و زیانی پێ دەگەنێت، هۆکارێکیشە بۆ فشارخستنە سەر بازاڕەکان و بەرزبوونەوەی نرخی دراوەکان.
باسی لەوەش کردووە، لە ماوەی چەند مانگی رابردوودا، شەش
ئۆپەراسیۆن بۆ رێگریکردن لە قاچاخچێتی دراو ئەنجام دراوە و ئۆپەراسیۆنەکان ئەنجامی
باشیان هەبووە.
ئەوەشی خستووەتە روو، پێویستە هەوڵەکان چڕتر بکرێنەوە
تاوەکو بە تەواوی و بەڕێژەی ١٠٠٪ رێگری لەو قاچاخچێتییە بکرێت کە زیانی گەورە بە
ئابووریی وڵات دەگەیەنێت.
لیژنەکە راشیگەیاندووە، بەدیجیتاڵکردنی مامەڵە داراییەکان
لە بانکە عێراقییەکان یارمەتیدەرە لە بەرزکردنەوەی سەقامگیری ئابووری و کەمکردنەوەی
مەترسییەکانی پەیوەست بە سپیکردنەوەی پارە و قاچاخچێتی دراو، هاوکات دەستنیشانکردنی هەوڵەکانی
سپیکردنەوەی پارە لە کەمترین کاتدا و ئاگادارکردنەوەی لایەنی پەیوەندیدار بۆ ئەو مەبەستە.
