راوێژکاری ئابووری سەرۆک وەزیرانی عێراق رایگەیاند، سەرەڕای ئەو گۆڕانکارییانەی بەسەر بازاڕەکاندا هاتووە تا ئێستا بازاڕی نەوت جێگیرە و چاوەڕێ ناکرێت گۆڕانکاری بەسەر ئەو بازاڕانەدا بێت.
ئەمڕۆ سێشەممە، مەزهەر محەمەد ساڵح راوێژکاری ئابووری محەمەد شیاع سودانی سەرۆک وەزیرانی عێراق بە ئاژانسی هەواڵی عێراقی راگەیاند، سەرەڕای ئەو گۆڕانکارییانەی لە بازاڕەکانی بۆرسەدا روویانداوە بازاڕی نەوت بە جێگیری ماوەتەوە.
ئەوەشی خستە روو، وەک عێراق ئەوەی لایان گرنگە بازاڕەکانی ئێستای وزە و
خواستی جیهانییە بۆ نەوتی خاو کە تا ئێستا جێگیرن و پێشبینی دەکرێت بەهۆی
بڕیارەکانی ئۆپیک پڵەس بۆ گۆڕینی ستراتیژی بەرهەمهێنان نرخی نەوت بەرەو بەرزی
بڕوات.
باسی لەوەش کرد، بەپێی ڕاگەیاندنی وزەی ئەمریکا، تێکڕای
نرخی هەر بەرمیلێک نەوت لە ساڵی ٢٠٢٤ بگاتە نزیکەی ٨٩ دۆلار، بەڵام دابەزینێکی وردە وردە لە نرخی نەوتی
جیهانیدا هەیە کە لە چوار ڕۆژ لەمەوبەرەوە دەستی پێکردووە.
ئەمەش لە
دوای ئەوە دێت، وەزارەتی نەوتی عێراق رایگەیاند، بەگوێرەی داتاکانیان لە ماوەی نیوەی
یەکەمی ئەمساڵدا تێکڕای هەناردەی نەوتی عێراق ٦٠٠ ملیۆن بەرمیلی تێپەڕاندووە، کە زۆرترین
هەناردە لە بەندەری بەسڕە و کێڵگەکانی ناوەڕاستەوە بووە.
پێشتریش، رێکخراوی
ئۆپیک پڵەس رایگەیاند، لە سەرەتای مانگی نۆوە دەستدەکەن بە کۆتایی هێنان بە کەمکردنەوەی
بەرهەمی نەوت و بەشێوەیەکی رێکخراو ئەندامەکانی بەرهەمهێنان زیاد دەکەن.