حکومەتی کاربەڕێکەری هەرێم رایگەیاند، لیستی مووچەی مانگی پێنج و شەشی هێزە ئەمنییەکانی هەرێمیان رادەستی بەغدا کردووە. دەشڵێت، "داوا لە بەغدا دەکەین مووچەی مانگی پێنج و شەشی هێزە ئەمنییەکانمان بۆ بنێرێت".
ئەمڕۆ چوارشەممە، حکومەتی کاربەڕێکەری هەرێم راگەیەنراوێکی بڵاو کردەوە و تێیدا هاتووە، وردبینیان لە لیستی مووچەی مانگی پێنج و شەشی هێزە ئەمنییەکانی هەرێمدا کردووە و رادەستی بەغدایان کردووە.
ئاماژە بەوەش
کراوە، لە ئێستادا چاوەڕوانی بەغدان، پارەی مووچەی مانگی پێنج و شەشی هێزە
ئەمنییەکانیان بۆ بنێرێت.
هەر ئەمڕۆ
چوارشەممە، نووسینگەى شۆڕش ئیسماعیل وەزیرى پێشمەرگەى هەرێم لە راگەیەنراوێکدا
ئاماژەى بەوە کرد، شاندێکی لیژنەی دارایی و چاودێریی دارایی عێراق ئەمڕۆ دەستی
کردووە بە وردبینى لیستى مووچەى هێزە ئەمنییەکانى هەرێم.
بەگوێرەی زانیارییەکانی
ئێن ئاڕ تی، ئەو شاندە تایبەت دەبن بە هەڵسەنگاندنی ناوی هێزەکانی پێشمەرگە و بەراوردکردنی
لیستی مووچەکانیان بەراورد بە سێ مانگی رابردوو، بەگوێرەی ئەو رێککەوتنەی کە کراوە
سێ مانگ جارێک لەلایەن لیژنەی چاودێری داراییەوە چاودێری و وردبینی گۆڕانکارییەکان
دەکرێت.
ئەوەش لە کاتێکدایە،
پێشمەرگە و هێزە ئەمنییەکانى هەرێم لە ٩٣ رۆژى رابردوودا تەنها یەک مووچەیان وەرگرتووە
و وەزارەتى دارایی عێراق رایگەیاند، حکومەتى کاربەرێکەر بە تەواوی و بێکەموکوڕی لیستى
مووچەى ئەو هێزانەى ئامادە نەکردووە، بۆیە پێویستى بە وردبینى زیاتر هەیە.