پەیامنێری ئێن ئاڕ تی رایگەیاند، بەهۆی ئەوەی چەندین ساڵە مامەڵەیان کردووە و تاوەکو ئێستا مووچەیان بۆ نەبڕاوەتەوە و بەشێکیان مووچەکانیان راگیراوە، بەشێک لە کەسوکاری شەهیدان و ئەنفالکراوان لەبەردەم وەزارەتی دارایی هەرێم گردبوونەوە.
ئەمڕۆ دووشەممە، پەیامنێری ئێن ئاڕ تی ئاماژەی بەوە کرد، بەشێک لە کەسوکاری شەهیدان و ئەنفالکراوان لەبەردەم وەزارەتی دارایی هەرێم گردبوونەوە و دەڵێن، داوای مافی خۆیان دەکەن و بەشێکیان تائێستا مووچەیان نیە و حکومەتی کاربەڕێکەریش هیچ وەڵامێکی نەداونەتەوە.
باسی لەوەش کرد، هەرچەندە حکومەتی کاربەڕێکەر بڕیاری لەسەرداوە بەڵام تاوەکو ئێستا
بڕیارەکە نەچووەتە بواری جێبەجێکردنەوە و مووچە بۆ بەشێک لە کەسوکاری شەهیدان و ئەنفالکراوان
نەبڕاوەتەوە و بەشێکیان لە ساڵی ٢٠١٥ـەوە مامەڵەکانیان تەواو کردووە بەڵام تا ئێستا
وەڵام نەدراونەتەوە.
ئەو کەسانەی گردبوونەتەوە بە ئێن ئاڕ تییان
راگەیاند، بەشێکی زۆریان نە قەرەبووکردنەوەیان وەرگرتووە و نە مووچەشیان بۆ بڕاوەتەوە
لەکاتێکدا چەندین ساڵە مامەڵەکانیان تەواو کردووە.
ئاماژەیان بەوەش کرد، لە هەڵەبجە و گەرمیان
و چەندین شوێنی جیاوازەوە هاتونەتە بەردەم وەزارەتی دارایی تاوەکو وەڵام بدرێنەوە
لەوەی کە بۆچی رێکارەکانیان بۆ تەواو ناکرێت تاوەکو مووچەکانیان وەربگرن.
هێرش قادر - هەولێر
