PM:03:32:11/02/2024
1448 جار خوێندراوەتەوە
چاوگێک بە دیجیتاڵ میدیای ئێن ئاڕ تی راگەیاند، بەهۆی کێشەیەکی کۆنی زەوی و زارەوە لەنێوان جوتیاران و بنەماڵەیەک لە کۆمەڵگەی چڕە لە سنووری دهۆک، شەڕ و گرژی دروست بووە و دەسترێژی گولـلە لە کەسێک کرا و بە سەختی بریندار بوو.
ئەمڕۆ یەکشەممە، چاوگێک بە ئێن ئاڕ تی راگەیاند، لە کۆمەڵگەی چڕەی سەر بە ناوچەی شێخان لە سنووری دهۆک بەهۆی کێشەیەکی کۆنی زەوی و زارەوە شەڕ لەنێوان جوتیارانی ئەو ناوچەیە و بنەماڵەیەک دروست بووە.
ئاماژەی
بەوەش کرد، لە ئەنجامی شەڕەکەدا دەسترێژی گولـلە لە کەسێک کراوە و بە سەختی بریندار بووە، لە ئێستادا
گواستراوەتەوە بۆ نەخۆشخانەی دهۆک.
باسی لەوەش
کرد، کێشەی ئەو بنەماڵەیە و جوتیارەکان کە هەردولایان دانیشتووی کۆمەڵگای چڕەن دەگەڕێتەوە
بۆ ساڵی ٢٠١٨، لەو کاتەوە بەهۆی کێشەی زەوی و زارەوە لە هەردوولا چەندین کەس گیانیان
لەدەستداوە و بریندار بوون، هاوکات چەند جارێکیش لەرێگەی یاساوە هەوڵی چارەسەر کردنی
ئەو کێشەیە دراوە، بەڵام تاوەکو ئێستا چارەسەر نەبووە و کێشەکە بەردەوامە.
تائیف گۆران
- دهۆک
