بەگوێرەی زانیارییەکانی ئێن ئاڕ تی، قاتی یەکەمی باڵەخانەی بەشەناوخۆییەکان سەمونجانە بووە و تانکیەکی لە سەربانی باڵخانەکە داناوە و تانکییەکە توشی لێچوونی غاز بووە تەقیوەتەوە. 
هەر دوای تەقینەوەکە بێوار عەبدولعەزیز وتەبێژی بەرگری شارستانی دهۆک بە ئێن ئاڕ تی راگەیاند، تەقینەوەکە بەهۆی لێچوونی تانکی غازی LPG بووە و زیان بەر باڵەخانەکانی نزیک لە رووداوەکە کەوتووە و پەنجەرەکانیان شکاوە.

دواتریش، مەسرور بارزانی سەرۆکی حکومەتی ماوەبەسەرچووی هەرێم رایگەیاند، "دەبێت بە ھەموو جۆرێک کارکردن بە سیستەمی غاز رابگیرێت و نابێت بە ھیچ جۆرێک بەکاربھێندرێت."

هاوکات، ئومێد خۆشناو پارێزگاری هەولێر رایگەیاند، "دوای ئه‌و چه‌ند رووداوه‌ی له‌ به‌کارهێنانی سیسته‌می غاز و ئه‌و کاره‌ساتانه‌ی لێی که‌وه‌ته‌وه‌، له‌ پێناو سه‌لامه‌تی گیانی هاوڵاتیان و لێکۆڵینه‌وه له‌ هۆکاره‌کانی ئه‌و سیستمه ‌و لێکه‌وته‌کانی، سه‌رۆکی حکومه‌ت بڕیریدا، بە هه‌موو جۆرێک کارکردن به‌و سیستمە رابگیرێ."

دەشڵێت، "داواکارین له‌ هاوڵاتیانی سنووری پارێزگای هه‌ولێر، هه‌موو کارکردنێک به‌و سیستمی غازه‌ ڕابگرن و هاوکاری تیمه‌کانی به‌رگری شارستانی و پۆلیسی شاره‌وانی و نه‌وت و کانزاکان و تیمه‌کانی قائیمقامیه‌ت و ناوه‌ندی قه‌یرانه‌کان بن."

ئەمەش لە کاتێکدایە، لە ماوەی کەمتر لە هەفتەیەکدا ئەمە دووەم رووداوی تەقینەوەیە بەهۆی لێچوونی سیستمی غازەوە و لە سلێمانیش بە هەمان هۆکار ماڵێک تەقیەوە و ١٥ کەس گیانیان لەدەستدا کە ١٤ـەیان ئەندامی یەک خێزان بوون و ١٢ کەسی دیکەش بریندار بوون.