ئەنجومەنی ئاسایش باسی لەوەشکردووە، دوای رووداوەکە دەزگا ئەمنییەکان دەستیان بە لێکۆڵینەوەکرد و شەش تۆمەتبار دەستگیرکران و دەرکەوتووە کە ئەو کردەوەیە لەلایەن تیمێکی دژەتیرۆری سلێمانی بە فەرمانی وەهاب مەجید باقی بەرپرسی دژەتیرۆی سلێمانی و کارزان محەمەد رەشید بەرپرسی هەواڵگری دژەترۆری سلێمانی.

ئەوەش خراوەتەڕوو، تیمەکە لە ١٠ تۆمەتبار کە ئەفسەر و کارمەندی دژەتیرۆری سلێمانین پێکدێن سەر بە تیمی چاودێرین لە دەزگای دژەتیرۆری سلێمانی و یاسر فەیسەڵ بەرپرسی تیمەکەش بەشداربووە لە کوشتنی ئەفسەرەکەی دژەتیرۆر و لە رێگەی چوار ئۆتۆمبێلەوە لە رێکەوتی ٣ی تشرینی یەکەمەوە تاوەکو ٦ی مانگ چاودێری بەردەوامی ماڵەکەی و هاتوچۆکانی هاوکار عەبدوڵای ئەفسەری دژەتیرۆر لە گەڕەکی سەربەستی ٣٢ پارک کردووە.

ئاماژەی بەوەشدا، لە رۆژی ٧ی مانگی تشرینی دووەم لە کاتژمێر ٢:٥١ ی بەرەبەیان هەستاون بە لکاندنی بۆمبێکی چێنراو بە بەشی ژێرەوەی ئۆتۆمبێلی تایبەتی هاوکار عەبدوڵا کە لە بەردەم ماڵەکەی خۆیدا بووە و پاشان لە چاودێریکردنی بەردەوامبوون.

دەشڵێت، "دوای ئەوەی لە کاتژمێر ١:٠٥ پاشنیوەڕۆ هاوکار عەبدوڵا لەگەڵ خێزانەکەی سواری ئۆتۆمبێلەکەی خۆی دەبێت تۆمەتبارەن لە رێگەی کۆنتڕۆڵی تایبەت بە بۆمبەکە ئۆتۆمبێلەکەی هاوکار عەبدوڵا دەتەقێننەوە."

باسی لەوەشکراوە، لەدوای تەقاندنەوەی ئۆتۆمبێلی ئەفسەرەکەی دژەتیرۆر راستەوخۆ تۆمەتباران لە پارێزگای هەولێرەوە دەگەڕێنەوە بۆ پارێزگای سلێمانی.

ئەنجوومەنی ئاسایشی هەرێم راشیگەیاند، لەسەر فەرمانی دادوەری دادگای لێکۆڵینەوەی ئاسایشی هەولێر داوایان لە دەزگا ئەمنییەکانی سلێمانی کردووە ئەو تۆمەتبارانەی بەشداربوون لە کوشتنی هاوکار عەبدوڵا رادەستی ئەمنییەکانی هەولێر بکەن.