ئاماژەی بەوەشکردووە، لیوا هاوبەشەکەی کە دروست دەکرێت لە نێوان هێزەکانی پێشمەرگە و سوپای عێراق دەبێت و ژمارەی هێزەکە دوو هەزار ئەندام دەبێت، دەشڵێت، هەزار ئەندامی سەر بە پێشمەرگە و هەزار ئەندامی دیکەی سەر بە سوپای عێراق دەبێت.

ئەوەشی خستووەتەڕوو، لە تەواوی ئەو ناوچانەی کە بۆشایی ئەمنی هەیە و دەکەونە نێوان هەرێم و بەغدا ئەو هێزانە جێگر دەکرێن، دەشڵێت، لە خانەقینەوە تاوەکو سحێلا ئەو هێزانە جێگر دەبن تیایاندا.

عەبدولخالق تەڵعەت راشیگەیاندووە، زۆرینەی ئامادەکارییەکان و رێوشوینە پێویستەکانی تایبەت بە مەشقکردن و کاروبارە هونەرییەکان و پڕچەککردنی دوو لیواکە تەواو بووە تەنیا ئەوە ماوە موچەکان لەسەر وەزارەتی بەرگری عێراق جێگربکرێت.

بەگوێرەی رێککەوتنی نێوان هێزەکانی پێشمەرگە و سوپای عێراق، دەبێت چەند بنکەیەکی هاوبەش و هەماهەنگی بکرێتەوە و ئەو ناوچانەی بۆشایی ئەمنییان هەیە لە نێوان هەردوولا بە هێزە هاوبەشەکە پڕبکرێنەوە و خاڵی پشکنینی هاوبەش لە نێوانیاندا دابمەزرێنن و لە میحوەرە جیاوازەکان چالاکییەکانیان فراوانتر بکەن.

ئەمەش لەکاتێکدایە، ئەو بۆشاییە ئەمنییەی لە نێوان پێشمەرگە و سوپای عێراقیدا دروستبووە، بووەتە دیارترین ئاڵنگارییەکانی بەردەمیان و چەکدارانی داعش سودێکی زۆریان لەو بۆشاییە ئەمنییە بینیوە بۆ ئەنجامدانی هێرشەکانیان بۆسەر هەردوولا و فراوانتر کردنی روبەری چالاکییەکانیان.