هەر بەپێى زانیارییەکانی ئێن ئاڕ تى، ئێران دەیەوێت ناوماڵی شیعە رێکبخرێت و هەموو لایەک بەشداری حکومەت بن.

لە ئێستادا پارتی لە نێوان بەرداشی پێکیهێنانی حکومەت و کاردانەوەکانی دوای پێکهێنانەکەدایە، ئەگەر حکومەتەکە تەنها بەشێکی شیعەی تیابێت.

ئەوەش لەکاتێکدایە، پارتى و سوننەکان و موقتەدا سەدر هاوپەیمانێتییەکیان بۆ پێکهێنانى حکومەتى نوێى عێراق دروستکردووە و خاوەنی نزیکەی ١٧٥ پەرلەمانتارن، بەڵام بۆ بەڕێوەچوونی دانیشتنی پەرلەمان بۆ هەڵبژاردنی سەرۆک کۆمار دەبێت ٢٢٠ پەرلەمانتار ئامادەبن.

هاوکات، چاوگێکی ئاگادار بە ئێن ئاڕ تی وت، چوارچێوەی هەماهەنگی و یەکێتی دەیانەوێت ١١٠ پەرلەمانتار کۆبکەنەوە و دانیشتنی پەرلەمان لە رۆژی ٧ ی مانگ لەسەر دەنگدانی بە سەرۆک کۆماری عێراق پەکبخەن.

بۆ تەواوبوونی نیساب و چارەسەرکردنی دۆخی سیاسی عێراق دەبێت سەدر رێگەبدات سەرکردەکانی چوارچێوەی هەماهەنگی بەشداری حکومەت بکەن کە سەدر لەمەدا رەزامەندە و تەنیا رێگری دەکات نوری مالیکی بەشداری بکات و چوارچێوەی هەماهەنگیش دەڵێن، "هەموومان پێکەوە بەشدای حکومەت دەکەین."

دەستوری عێراق ٣٠ رۆژی دیاریكردووە بۆ هەڵبژاردنی سەرۆک كۆمار دوای یەکەم دانیشتنی پەرلەمان و رۆژی ٨ی مانگ وادەکە کۆتایی دێت.

لە ئەگەری دووەمدا، نیساب تەواو نابێت و دانیشتنەکە بەڕێوەناچێت و بەپێی دەقە یاساییەکان، لەکاتێکدا رۆژی دووشەممە نیساب بۆ بەڕێوەچوونی دانیشتنی پەرلەمان دروستنەبوو، سەرۆک كۆماری ئێستا لە پۆستەكەی خۆی بەردەوام دەبێت تا ئەوكاتەی لایەنەكان دەگەنە رێككەوتن‌ بۆ بەڕێوەچوونی دانیشتنی پەرلەمان و دواتر سەرۆک كۆماری نوێ هەڵدەبژێردرێت.