PM:03:03:25/08/2026
608 جار خوێندراوەتەوە
سەرۆکی دەستەی دەستپاکیی عێراق ڕایگەیاند، کە پرۆسەی بەرقەرارکردنی دەوڵەتی یاسا و پاککردنەوەی دامەزراوەکان لە گەندەڵی، پێویستی بە ئیرادەیەکی نیشتمانیی گشتگیر و پشتگیریی بەهێزی جەماوەری هەیە و لە هەڵمەتەکانیان بەردەوام دەبن.
ئەمڕۆ سێشەممە ٢٥ـی ئابی ٢٠٢٦، محەمەد عەلی لامی، سەرۆکی دەستەی دەستپاکیی عێراق وتی، هیچ فشار و لایەنێک ناتوانێت ببێتە ڕێگر لە بەردەم کارەکانیان بۆ بنەبڕکردنی گەندەڵی، و هیچ پێکهاتە یاخود گروپێکی دیاریکراویش نەکراوەتە ئامانج، بەڵکو تەنها ڕووبەڕووی ئەو کەسانە دەبنەوە کە دەستیان بردووە بۆ سامانی گشتی.
وتیشی، بنەبڕکردنی گەندەڵی و
خاوێنکردنەوەی دامودەزگاکانی دەوڵەت تەنها بە ڕێکارە دادوەرییەکان سەرکەوتوو
نابێت، بەڵکو پێویستی بە هاوکاری و بەشدارییەکی بەهێزی کۆمەڵایەتی و نیشتمانی هەیە
و ئامانجی سەرەکییان تەنها رووبەڕووبوونەوەی گەندەڵکارانە بەبێ جیاکاری لە نێوان
پێکهاتە و گرووپەکاندا، و لەم پێناوەشدا سوورن لەسەر پاراستنی قوت و سامانی هاوڵاتییان
لە هەر دەستدرێژییەک.
