دوای گەیاندنی پەیامێک لە زیندانەوە کێشەی خورشید سەریهەڵدایەوە و هێزێکی زۆری پارتی گەمارۆی گوندی گردەڕەشیان دا و پۆلیسی هەولێریش دەڵێت، لە گوندەکە هەوڵی پشێووی دراوە و چەند کەسێک راگیراون.
بەگوێرەی زانیارییەکان خورشید هەرکی لە زیندانەوە پەیامی ناردووە کە دادگا بە نیازە سزای قورس بەسەر خۆی و براکەیدا بسەپێنێت، بەو هۆیەشەوە گەنجانی بنەماڵەکەی رێگاکانی گوندی گردە رەشەیان لە سنووری خەبات گرت.
هەر بەپێی زانیارییەکان رێگریی لە ئازادکردنی حەیدەر
هەرکی برای خورشید هەرکی کراوە و خورشید هەرکیش ئەمەی رەتکردووەتەوە.
هاوکات لە کاتی رووداوەکەدا رەیان خورشید هەرکی
بە ئێن ئاڕ تی وت، مامی و کەس و کاریان لە وەزارەتی ناوخۆن بۆ چارەسەرکردنی کێشەکەیان.
دوای ئەوەش پارتی هێزێکی زۆری رەوانەی گوندەکە
کرد و بەپێی زانیارییەکان، تا ئێستاش هێزەکانی پارتی لە ناوچەکە ماون و گەمارۆی
گوندەکەیان داوە.
لەسەر رووداوەکەش، پۆلیسی هەولێر راگەیەندەاوێکی
بڵاوکردەوە و دەڵێت، چەند کەسێک لە گوندی گردەڕەشەی سنووری خەبات دەستیان
کردبوو بە دروستکردنی پشێووی و نا ئارامی، دەشڵێت، بۆ رێگریکردن لەوە هێزەکانیان گەیشتنە
سنوورەکە و ئەوانەی دەستیان لە دروستکردنی پشێووییەکە هەبوو بە فەرمانی دادوەر ڕاگیراون،
هەروەها ڕیکاری یاسایی بەرامبەر هەر کەسێکی دیکەش دەگیرێتە بەر کە بەشداریان لەو
رووداوە کردووە.
ئەوە لەکاتێکدایە، دوای دەستگیرکردنی خورشید هەرکی
و براکەی لەلایەن هێزە ئەمنییەکانەوە، مانگی رابردوو پۆلیسی هەولێر کۆمەڵێک تۆمەتی
قورسی ئاڕاستە کردوون کە سزاکانیان لە پێبژاردنەوە تاوەکو لەسێدارەدان دەڕوات.
هەر بەپێی زانیارییەکانی ئێن ئاڕ تی خورشید هەرکی
و براکەی لەو زیندانەی پۆلیس زیندانیکراون کە پێشتر پێشمەرگەکەی پارتی لە رووداوێکی
تەم و مژاویدا گیانی لەدەستدا و تەرمەکەی رادەستی کەسوکارەکەی کرایەوە.