PM:04:23:03/02/2026
1004 جار خوێندراوەتەوە
سەرۆکی بزوتنەوەی نەتەوەپەرستی تورکیا (مەهەپە) دەڵێت، ئەوانەی پلانی تێکدانی برایەتی ئەبەدی تورک و کوردیان هەیە، دەدۆڕێن. دەشڵێت، بڕیاری ئێمە زۆر روونە، عەبدوڵا ئۆجەلان و سەڵاحەدین دەمیرتاش ئازاد دەکرێن.
ئەمڕۆ سێشەممە ٣ـی شوباتی ٢٠٢٦، دەوڵەت باخچەلی، سەرۆكی بزوتنەوەی نەتەوەپەرەستی توركیا (مەهەپە) لەوتارێكدا وتی، رێککەوتنی حکومەتی سوریا و هەسەدە/یەپەگە لەسەر ئاگربەستێکی هەمەلایەنەو یەکخستنی قۆناغ بە قۆناغی پێکهاتە سەربازی و ئیدارییەکان بۆ کۆماری سوریا، وەرچەرخانێکی یەکلاکەرەوەو پێشوازی لێکراوی بەهێزکردنی سەروەری سوریاو دەستەبەرکردنی سەقامگیری درێژخایەنە.
باسی لەوەشکرد، تورک هی ئێمەیە، کورد هی ئێمەیە، نەتەوەی تورک ئێمەیە
و هەموومان یەکین و بڕیاری ئێمە روونە، عەبدوڵا ئۆجەلان لە مافی هیوا
"ئازادکردنی بەمەرج" سوودمەند دەبێت، ئەحمەد تورک و هاوڕێكانی دەگەڕێنەوە
بۆ پێگەی خۆیان (واتا دەبنەوە بە سەرۆكی شارەوانی)، دەمیرتاش ئازاد دەکرێت و دەگەڕێتەوە
ناو ماڵ و منداڵی خۆی.
لە بەشێکی
قسەکانیدا دەوڵەت باخچەلی وتی، کورد بریتیی نییە لە پەکەکە و یەپەگە و دەبێت
مافیان هەبێت لە تورکیای بێ تیرۆر و سوریای یەکپارچەدا و رێککەوتنەکان
جێبەجێبکرێن، گوێ بەو دەنگانەش نادەن کە دەیانەوێت رێگە لە ئامانجەکانی تورکیا
بگرن بۆ سەقامگیربوون.
