نووسەر و رۆژنامەنووسێکی کورد لە کەنەدا خەڵاتی باشترین نووسەری کەنەدای بۆ ساڵی ٢٠٢٥ وەرگرت لەپای ئەو کارانەی بۆ بەرگریکردن لە مافەکانی مرۆڤ و ئازادی رادەربڕین، هەروەها بۆ بەرگریکردن لە کەیسی رۆژنامەنووس شێروان شێروانی و هاوڕێ سزادراوەکانی ئەنجامیدا.
دیاری مارف، نووسەر و رۆژنامەنووسی کورد لە کەنەدا خەڵاتی ماری ئانژ گاریک وەک باشترین نووسەری ساڵی ٢٠٢٥ـی کەنەدا وەردەگرێت، لەپای ئەو کارانەی بۆ شێروان شێروانی و هاوڕێ سزادراوەکانی لە چەند ساڵی رابردوودا، لە نووسین و پەیوەندی و کەمپین و سیمینارەکانی لە کەنەدا و ئەمریکا و ئیتاڵیا ئەنجامیدا.
خەڵاتی ماری ئانژ گاریک کە رێکخراوی پێن – کەنەدا ساڵانە دەیداتە
باشترین نووسەری بیانی کەنەدا، ئەمساڵ بڕیارە نووسەرێکی کورد ئەو خەڵاتە وەربگرێت.
خەڵاتەکە لەسەر ئەم بنەمایانە دەدرێت بە دیاری مارف:
- نووسینی چەندین وتار لەسەر کەیسی شێروان شێروانی و هاوڕێ
دەستگیرکراوەکانی لە چەند میدیایەکی ئیتاڵیا
- ئەنجامدانی سیمینار و لەسەر کەیسەکە لە پەیمانگای واشنتنی ئەمریکا
نووسین و بڵاوکردنەوەی چەندین وتار لە میدیاکانی کەنەدا لەسەر کەیسەکە و دروستکردنی
کەمپینی نوسەران و رۆژنامەنوسانی کەنەدا لەسەر دۆسیەی شێروان شیروانی و گەیاندنی
نامەی ناڕەزایی بە کونسوڵخانەی کەنەدا.
- کارکردن لەگەڵ نوسینگەی جەستن ترۆدۆ سەرۆک وەزیرانی پێشووی کەنەدا
لەسەر کەیسی شێروان شیروانی و سەرئەنجام ناردنی نامەیەکی ناڕەزایی بە نێچیرڤان
بارزانی، سەرۆکی هەرێم.
دیاری خالید مارف، لەدایکبووی سەیدسادقە و خاوەنی بڕوانامەی ماستەرە
لە مێژوو لە زانکۆی پونەی هیندستان، ماوەی ۱٠ ساڵ لە چەند دەزگایەکی راگەیاندنی هەرێم وەک
رۆژنامەنوس کاریکردووە و نزیکەی ۱٠ ساڵە
لە کەنەدا دەژی، بە زمانی کوردی وئینگلیزی لە بوارەکانی مافی مرۆڤ و ئازادی
دەربڕین و دۆخی هەرێم دەنووسێت و خاوەنی چەند کتێبێکی چاپکراوە لەسەر مێژوو و
رۆژهەڵاتناسی.