عێراق پێشوازی لە هەوڵە ناوچەیی و نێودەوڵەتییەکان دەکات کە بوونەتە هۆی رێککەوتنی ئاشتی لە غەززە، داواش دەکات مافە رەواکانی گەلی فەڵەستین و گەیشتن بە خواستەکانیان بۆ دەستەبەر بکرێت.
ئەمڕۆ پێنجشەممە، ٩ـی تشرینی یەکەمی ٢٠٢٥، وەزارەتی دەرەوەی عێراق لە بارەی رێککەوتنی ئاشتی غەززە راگەیەندراوێکی بڵاوکردەوە و دەڵێت، عێراق پێشوازی لە هەوڵە ناوچەیی و نێودەوڵەتییەکان دەکات کە بوونەتە هۆی رێککەوتنی ئاشتیی غەززە.
ئاماژەی
بەوەشکرد، پاڵپشتیی خۆی بۆ هەوڵەکان بە ئامانجی کەمکردنەوەی ئازارەکانی خەڵکی سڤیل
و هێنانە کایەی سەقامگیری دووپات دەکاتەوە، هەروەها مافە رەواکانی گەلی فەڵەستین و
گەیشتن بە خواستەکانیان بۆ دامەزراندنی دەوڵەتی فەڵەستینی دەستەبەر دەکات.
لە راگەیەندراوەکەیدا
جەختی کردەوە، پێویستە ئاگربەستی خێرا و کۆتاییهێنان بە شەڕ و گەیاندنی هاوکارییە
مرۆییەکان بەبێ گرفت بۆ ئەو کەسانەی کە زیانیان بەرکەوتووە فەراهەم بکرێت، ئەمەش
دەبێتە هۆی دروستکردنی کەشێکی مرۆیی بۆ گەیشتن بە ئاسایش و سەقامگیری لە ناوچەکەدا.
ئەوەش دوای
ئەوەی دوێنێ دۆناڵد ترەمپ، سەرۆکی ئەمەریکا وتی، ئیسرائیل و حەماس لەسەر قۆناغی
یەکەمی رێککەوتنە پێشنیازکراوەکەی سەر غەززە رێککەوتوون، کە ئازادکردنی سەرجەم
بارمتە ئیسرائیلییەکان، کشانەوەی هێزەکانی ئیسرائیل تا شوێنی دیاریکراو و راگرتنی
شەڕ لەخۆدەگرێت.