باسیان لەوەشکرد، بڕیارە بنیامین ناتانیاهۆ، سەرۆکی ئیسرائیل پەرلەمانی ئیسرائیل کۆبکاتەوە بۆ پەسەندکردنی پلانەکە.

لەسەر رێککەوتەکەس دۆناڵد ترەمپ دەڵێت، ئیسرائیل هێزەکانی بۆ هێڵێکی رێککەوتوو دەکشێنێتەوە وەک یەکەم هەنگاو بەرەو ئاشتییەکی هەمیشەیی و وتیشی، مامەڵە لەگەڵ هەموو لایەنەکان بە دادپەروەرییەوە دەکرێت، ترەمپ باسی لەوەشکرد، رەنگە یەکشەممەی هەفتەی داهاتوو سەردانی رۆژهەڵاتی ناوەڕاست بکات.

لایخۆیەوە حەماس رێککەوتنەکەی پشتڕاستکردەوە و وتی، رێککەوتنەکە بۆ کۆتاییهێنانە بە شەڕی غەززە و کشانەوەی هێزەکانی ئیسرائیلە لە کەرتەکە و گەیشتنی یارمەتییە مرۆییەکان و ئاڵوگۆڕکردنی دیل و بارمتەکان لەخۆدەگرێت.

لەلایەکی دیکەوە، وتەبێژی وەزارەتی دەرەوەی قەتەر وتی، لە دانوستانەکانی میسر رێککەوتن لەسەر خاڵەکانی جێبەجێکردنی قۆناغی یەکەمی رێککەوتنی ئاگربەست لە غەززە کراوە. دووپاتیشی کردەوە رێککەوتنەکە دەبێتە هۆی وەستاندنی شەڕ و ئازادکردنی دیلەکانی ئیسرائیل و زیندانییانی فەلەستینی.

خەڵکی غەزە لەم بارەیەوە دەڵێن، لەماوەی دوو ساڵی شەڕی هەردوولا ، کەرتی غەززە وێران بووە و هێشتا کاتێکی سەخت چاوەڕێمان دەکات، بەڵام گرنگ ئەوەیە کە لەمەودوا سەلامەت بین.