PM:03:01:19/09/2025
676 جار خوێندراوەتەوە
دەزگای بەرەنگاربوونەوەی تیرۆری عێراق دەڵێت، ئەو کەسەی کە بەرپرس بووە لە تەقاندنەوەی باڵیۆزخانەی ئێران لە لوبنان و بەرپرسی ئۆپراسیۆنەكان و ئاسایشی دەرەوەی داعش، بەرەبەیانی ئەمڕۆ كوژرا.
ئەمڕۆ هەینی ١٩ـی ئەیلوولی ٢٠٢٥، دەزگای بەرەنگاربوونەوەی تیرۆری عێراق بڵاویکردەوە، (عومەر عەبدولقادر بەسام) ناسراو بە عەبدولڕەحمان حەلەبی، بەیانی ئەمڕۆ لە ئۆپراسیۆنێكدا لەناو خاكی سوریا و بە هەماهەنگی هێزەكانی هاوپەیمانی نێودەوڵەتی كوژرا.
وتیشی، حەلەبی بەرپرسی ئۆپراسیۆنەكان و ئاسایشی دەرەوەی رێكخراوی داعش بوو، بەشێوەیەكی
راستەوخۆ دەستی هەبوو لە تەقینەوەی باڵیۆزخانەی ئێران لە لوبنان و، هەوڵدان بۆ
جێبەجێكردنی كردەوەی تیرۆریستی تر لە ئەوروپا و ویلایەتە یەكگرتووەكانی ئەمریكا،
كە بە هەوڵی وردی هەواڵگری پوچەڵكراونەتەوە.
باسی لەوەشکرد،
کوژرانی ئەم کەسە لەدوای چاودێریی وردی هەواڵگری و پاڵپشتی
دادوەریی عێراقەوە دێت كە بۆ ماوەی چەند ساڵێك بەردەوام بووە، ئەمەش زیانێكی
ستراتیژی گەورەیە بۆ رێكخراوە تیرۆریستییەكە و لەدوای زنجیرەیەك ئۆپراسیۆنی
سەركەوتوو دێت لەم دوو مانگەی رابردوودا.
