بەڵام لە هەرێمى کوردستان، لەگەڵ تاوسەندنى زیاترى گەرمادا حکومەتى کاربەرێکەر تادێت کاتژمێرەکانى پێدانى کارەباى نیشتیمانى کەمتر دەکاتەوە، بەشێوەیەک ئێستا کەمتر لە شەش کاتژمێر کارەبا دەدرێت بە هاوڵاتییان و نزیکەى هەزار و ٦٠٠ مێگاوات کارەباش دەفرۆشرێت بە عێراق.

لەکاتێکدا پلەکانى گەرما لە عێراق و هەرێمى کوردستان لەسەر ئاستى جیهان بەرزترین پلەیان تۆمارکردووە و هاوڵاتییان لە هەر کاتێک زیاتر پێویستیان بە کارەبا هەیە، حکومەتى کاربەرێکەر کارەباى خەڵکى هەرێمى کوردستانى فرۆشتووە بە موسڵ و دیالە و شارەکانى دیکە. بەشێوەیەک لە سێ هەزار و ٥٠٠ مێگاوات کارەبا نزیکەى هەزار و ٦٠٠ مێگاوات کارەباى فرۆشتووە، بەوەش کەمترین بڕى ماوەتەوە و ئێستا هاوڵاتییانى هەرێم نزیکەى پێنج کاتژمێر کارەبایان لە شەو و رۆژێکدا پێدەدرێت و باقییەکەى بە کارەباى مۆلیدە پڕ دەکرێتەوە و ئەوەش لەسەر گیرفانى خەڵک.

بۆ ئەوەى کارەباى ٢٤ کاتژمێرى بدرێت بە هاوڵاتییان دانیشتووانى هەرێمى کوردستان پێویستییان بە نزیکەى حەوت هەزار مێگاوات کارەبا هەیە، بەڵام ئێستا نزیکەى سێ هەزار و ٥٠٠ مێگاوات کارەبا بەرهەم دەهێنرێت و دەتوانرێت لانیکەم ١٢ کاتژمێر کارەباى نیشتیمانى پێبدرێت، بەڵام دەسەڵاتدارانى هەرێم ٣٣%ى ئەو کارەبایەیان فرۆشتووە بە عێراق و بەوەش کەمترین بڕى کارەبا دەدرێت بە خەڵک.

لە ٣٢ ساڵى رابردوودا پارتى و یەکێتى هەموو هەڵبژاردنێک بەڵێنى کارەباى ٢٤ کاتژمێرییان بە خەڵک داوە و دواترى بیرى خۆیانى دەبەنەوە، بۆیە پێشبینى کراوە لەگەڵ گەرمبوونى هەڵمەتى ئەم هەڵبژاردنەشدا جارێکى دیکە بانگەشەى ئەوە بکەن کارەبا دابین دەکەن.