PM:03:20:12/05/2024
1116 جار خوێندراوەتەوە
وەزارەتی پەیوەندیدار بە کاروباری کۆچبەران لە ئەفغانستان رایگەیاند، دوای ئەوەی لە رۆژی هەینی لافاوێکی بەهێز ناوچەکانی باغلان و بۆرکای لە ئەفغانستان گرتەوە، بە هۆیەوە ٣١٥ کەس گیانیان لەدەستداوە و زیاتر لە هەزار و ٦٠٠ کەسیش بریندار بوون. دەشڵێت، "پێشبینی دەکرێت بە هۆی رووخانی ماڵ و باڵەخانەکانەوە ژمارەی گیانلەدەستدان بەرزتر ببێتەوە".
ئەمڕۆ یەکشەممە، وەزارەتی پەیوەندیدار بە کاروباری کۆچبەران لە ئەفغانستان لەبارەی زیانەکانی ئەو لافاوەی چەند رۆژێکە وڵاتەکەی گرتووەتەوە راگەیاندراوێکی بڵاوکردەوە و تێیدا هاتووە، رۆژی هەینی لافاو و زریانێکی بەهێز، باکوری رۆژهەڵاتی ئەفغانستانی گرتەوە، تا ئێستاش بەوهۆیەوە ٣١٥ کەس گیانیان لەدەستداوە و هەزارو ٦٣٠ کەسیش بریندار بوون.
ئاماژە بەوەش کراوە، لافاوەکە زیانی بە ١٠ ناوچەی ئەفغانستان و باغلان و بۆرکا گەیاندووە، کە لە ئەنجامدا
٦٦٥ ماڵ روخاون و هەزار سەر ئاژەڵیشی لەناوبردووە، پێشبینیش دەکرێت ژمارەی گیانلەدەستدان
و برینداربوون و زیانە مادییەکان بەرزتر ببنەوە.
باس لەوەش کراوە، داوا لە رێکخراوی هاوکاری وڵاتانی ئیسلامی کراوە کە
هاوکاری مرۆیی و تەندروستی بگەیەندرێتە ناوچە زیانلێکەوتووەکان، بەهۆی کەمی خۆراک
و نەبوونی بنکەی تەندروستییەوە. وتیشی، "بەهۆی کارەساتی سروشتییەوە، دانیشتوانی
ئەو ناوچەیە مەترسییان لەسەرە و پێویستە بە زوترین کات هاوکاری مرۆی و مادی بکرێن".
لەو بارەیەشەوە، ئیبراهیم عومری راوێژکاری کۆچ وکۆچبەرانی سەرۆکی تاڵیبان لە
باغلان رایگەیاند، زیانێکی زۆری مرۆیی بەر ناوچەکانی باکووری باغلان و بۆرکا گەشتووە
و پێویستە هاوکاری مرۆیی پێسکەش بە دانیشتوانی ناوچەکە بکرێت بەر لەوەی کارەساتی
مرۆیی لێبکەوێتەوە.
