لابید ئاماژەی بەوەشکردووە، "ئەوەی لە ئێستادا رێککەوتنی لەسەر کراوە زۆر خراپە، چونکە رێگە بە ئێران دەدات لە ساڵێکدا سەدان ملیار دۆلاری دەست بکەوێت، ئەم پارەیەش لەپێناو بونیادنانی قوتابخانە و نەخۆشخانەکاندا خەرج ناکات بەڵکو لە تێکدانی سەقامگیری وڵاتانی رۆژهەڵاتی ناوەڕاستدا بەکاری دەهێنێت و ترس و تۆقی لەسەرتاسەری جیهاندا پێ بڵاودەکاتەوە."

سەرۆکی حکومەتی ئیسرائیل لە درێژەی قسەکانیدا باسی لەوەشکردووە، "پارە و داهاتی دەستکەوتووی ئێران بۆ سوپای پاسداران خەرج دەکرێت و پارەی ئەو کەسانە دابین دەکات کە گەلی ئێران دەچەوسێننەوە و پارە بۆ هێرشی زیاتر بۆ سەر بنکەکانی ئەمریکا لە رۆژهەڵاتی ناوەڕاست دابین دەکات، هاوکات بۆ بەهێزکردنی حیزبوڵا و حەماس و جیهادی ئیسلامی بەکاردەهێنرێت".

لە لایەکی دیکەشەوە، لابید لە پەیوەندییەکی تەلەفۆنیدا لەگەڵ بەرپرسانی ئەمریکا وتیشی، "ئیمە دەرگای گفتوگۆمان کراوەیە لەگەڵ ئەمریکادا وئامادەین گفتوگۆی هەموو ئەو بابەتانە بکەین کە تێیدا ناکۆکین و بیروڕامان جیاوازە".

لابید سەبارەت بە پەیوەندییەکانیان لەگەڵ ئەمریکا ئەوەشی خستووەتەڕوو، "ئێمە و ئەمریکا خاوەن بیر و کاری هاوبەشین و ئەمریکاش نزیکترین هاوپەیمانی ئێمەیە و جۆ بایدنیش یەکێکە لەباشترین هاوڕێکانی ئیسرائیل هەتا ئێستا."

سەرۆکی ئەنجومەنی وەزیرانی ئیسرائیل لەکۆتاییدا وتیشی، "ئەگەر واژۆی بەڵێننامەکە بکرێیت، ئەوا ئیسرائیل پێوەی پابەند نابێت و ئێمە دژی ئەوەین ئێران ببێتە یەکێک لە وڵاتانی خاوەن چەکی ئەتۆمی."