چاوگێک لە وەزارەتی داراییەوە بە ئێن ئاڕ تی راگەیاند، سبەینێ موچەی دەزگای گشتی ئاسایشی هەرێم دابەشدەکرێت. ئەوەش لە کاتێکدایە، لە ٢ی ئەم مانگەوە حکومەتی هەرێم دەستی بە دابەشکردنی موچە کردووە و رۆژانە موچەی یەک یان دوو وەزارەت و شوێن دەدات.
دابەشکردنی موچە لە رۆژی ٢ی مانگەوە دەستیپێکردووە و تاوەکو ئێستا وەزارەتی دارایی لیستێکی تەواوەتی بۆ موچە بڵاونەکردووەتەوە و دابەشکردنی موچە بە خاوی بەڕێوەدەچێت. جگە لەوەی ئەو موچەیەی دابەشدەکرێت؛ موچەی مانگی ١٢ی ساڵی رابردووە.
دوێنێ دووشەممە، موچەی ئەنجومەنی ئاسایش دابەش کرا و
بڕیارە سبەی چوارشەممە موچەی دەزگای گشتی ئاسایش موچە وەربگرن.
گۆڕانکارییەکان لە لیستی موچەدا بە جۆرێکە بڕیاربوو رۆژی
پێنجشەممە، وەزارەتەکانی پەروەردە و کاروباری کۆمەڵایەتی موچە وەربگرن، بەڵام گۆڕانکاری
لە لیستەکەدا کرا و گۆڕدرا بۆ "فەرماندەیی زێرەڤانی، ليوای نەوت و گاز، هێزی
ئامادەیی سلێمانی و وەزارەتی شەهیدان و ئەنفالکراوان."
لە پێشتردا، لە ماوەی کەمتر لە ٢٤ کاتژمێردا، وەزارەتی
دارایی هەرێم سێ جار گۆڕانکاری لە لیستی موچەدا پێنجشەممەدا کرد و هەر جارە و ناوی
چەند وەزارەتێک دەبات. لە ئێستاشدا حکومەتی هەرێم هەر رۆژەی موچەی یەک یان دوو دەستە و
وەزارەت و شوێن دابەشدەکات.
ئەوەش لەکاتێکدایە، حکومەتی هەرێم پێشتر بانگەشەی ئەوەی
کرد، کە هەموو ٢٥ی مانگێک موچە دابەشدەکات.
داھاتی نەوتی فرۆشراو بە بۆری زیاتر لە ترلیۆنێک و ٢٠٠
ملیار دینارە و کۆی داھاتی ناوخۆش زیاتر لە ٥٠٠ ملیار دینارە لەگەڵ ھاوکاری مانگانەی
ھاوپەیمانان کە ٢٨ ملیار دینارە، بەڵام حکومەت بۆ دابەشکردنی موچە چاوی لە ٢٠٠ ملیارەکەی
بەغدایە.
هێرش قادر، هەولێر
هـ.ئـ