سەرەڕای بانگەشەکانی حکومەتی ماوەبەسەرچوو بۆ دابینکردنی بەنزینی پاڵپشتیکراو، قەیرانی بەنزینی ٧٥٠ دیناری قوڵتر بووەوە، لە هەولێر فرۆشتنی بەنزین کرایە کۆبۆن، لە سلێمانی و دهۆکیش ژمارەی بەنزینخانەکان و بڕی بەنزینەکە کەمکرایەوە.
دوای چوار ڕۆژ لە بانگەشەی حکومەتی ماوەبەسەرچوو بۆ دابینکردنی بەنزینی ٧٥٠ دیناری بە بڕی پێویست، بەڵام بەهۆی کەمیی بڕەکەیەوە شۆفێران ناچارن چەندین کاتژمێر لە نۆرەی درێژدا بمێننەوە و هەندێکجار بەبێ وەرگرتنی بەنزین دەگەڕێنەوە.
کەمکردنەوەی ژمارەی ئەو بەنزینخانانەی بەنزینی ٧٥٠
دیناری دەفرۆشن هۆکاری سەرەکیی دروستبوونی ئەم قەرەباڵغییە زۆرەیە.
لە نوێترین
پێشهاتدا و دوای شکستخواردنی شێوازەکانی پێشوو، لە هەولێر فرۆشتنی بەنزینی ٧٥٠
دیناری جارێکی تر کرایەوە بە کۆبۆن و لەمڕۆوە لە ٢٢ بەنزینخانەدا تەنها بەو شێوازە
دەفرۆشرێت.
لە پارێزگای
سلێمانیش، هەرچەندە بڕیاربوو لە ١٦ بەنزینخانە بە شێوەی ٢٤ کاتژمێری بەنزینەکە
دابەش بکرێت، بەڵام بەهۆی کەمیی بەنزینەکە و درەنگ گەیشتنی بە بەنزینخانەکان، کاتی
کارکردنیان بۆ ١٢ کاتژمێر کەم کراوەتەوە و شۆفێران ناچارن بۆ دەستکەوتنی بڕێک
بەنزین سەردانی چەندین بەنزینخانە بکەن.
هاوکات لە
سنووری سەنتەری دهۆک و زاخۆ، لە کۆی ٢٥ بەنزینخانەیەک کە پێشتر بڕیاربوو بەنزینی ٧٥٠
دیناری تێدا بفرۆشرێت، ئێستا تەنها لە نۆ بەنزینخانەدا دابەش دەکرێت، ئەمەش
قەرەباڵغی و ناڕەزایەتیی شۆفێرانی زیاتر لێکەوتووەتەوە.
سەبارەت بە
بەنزینی بازرگانیش، هاوڵاتییان و شۆفێران ئاماژە بەوە دەکەن کە حکومەتی
ماوەبەسەرچوو لە دابەزاندنی نرخی بەنزینی بازرگانیشدا شکستیهێناوە و بڕیارەکانی
هیچ کاریگەرییەکی ئەرێنییان لەسەر بازاڕ نەبووە.