ئاماژەی بەوەشکرد، مەترسیى ئەم دەستدرێژییە تەنیا سنوورى شوێن و ناسنامەى ئامانجەکان تێدەپەڕێنێت ئێمە لەبەردەم پەرەسەندنێکى زۆر مەترسیدار و ئاڵۆزداین، کە ناتوانرێت لە پەرەسەندنە ناوچەییەکان و هەوڵدان بۆ گواستنەوەى لێکەوتەکانى بۆ ناوخۆى عێراق جیابکرێتەوە.  بەئامانجگرتنى دامەزراوە فەرمییەکانى هەرێم بە دەستپێکردن لە خاکى دەوڵەتێکى دراوسێوە، دەستوەردانێکى راستەوخۆیە لە سەروەریى عێراق و ئەمنییەتى نیشتمانى، و هەڕەشەى راکێشانى وڵاتەکەمان دەکات بۆ ململانێیەک کە عێراقییەکان هەڵیاننەبژاردووە و هیچ بەرژەوەندییەکیان تێدا نییە.

لە بەشێکی دیکەی قسەکانیدا ووتی، ئەم دەستدرێژییە رەهەندێکى دیکەى زیاتریش وەردەگرێت بەوەى هاوکاتە لەگەڵ یادى ٨٠ ساڵەى دامەزراندنى پارتى، لە کاتێکدا ناوچەکە پێویستى بە فراوانکردنى پانتاییەکانى گفتوگۆ و هێورکردنەوەیە نەک گۆڕەپانى رووبەڕووبوونەوە. هەرێم بەو پەیوەندی و کەناڵانەى کە لەگەڵ لایەنە جیاوازەکان هەیەتی، توانای هەیە بەشدار بێت لە لێکنزیککردنەوەى دیدگاکان و پشتیوانیکردنى رێڕەوەکانى هێورکردنەوە، لەنێویاندا لەنێوان تاران و واشنتن، کە ئەمە رۆڵێکە شایەنى پشتیوانیکردن و بەهێزکردنە، نەک ئامانجگرتن و پەکخستن.

باسی لەوەشکرد، داوا لە حکوومەتى فیدراڵى دەکەین وەک کەیسێکى سەروەریى و ئەمنییەتى نیشتمانى مامەڵە لەگەڵ ئەوەى روویداوە بکات، و لایەنە بەرپرسەکان ئاشکرا بکات و رێکارى پێویست بۆ پاراستنى خاکى عێراق و دامەزراوەکانى دەوڵەت بگرێتەبەر.