وتیشی، ئەگەر هەمان لۆژیکی شیعە و سوننە بۆ دیاریکردنی کاندیدەکان بەکاربهێنین، ئەوا مافی پارتییە کاندید بۆ پۆستی سەرۆک کۆمار دیاری بکات و ئێستا پارتی ئامادەیە رەچاوی زۆرینەی خەڵکی کوردستان و بەرژەوەندییەکانیان بکات، ئەویش بە قبوڵکردنی رێککەوتن (کۆدەنگی) لەسەر کاندیدێکی یەکگرتوو.

ئاماژەی بەوەشکرد، ئەگەر لایەنەکانی دیکە ئامادە نەبن کاریان لەگەڵ بکەن بۆ کاندیدێکی یەکگرتوو، ئەوا تەنها دەتوانن لە رێگەی پرۆسەیەکی دیموکراسییانەی دادپەروەرانەوە بگەنە ئەنجام. ئەویش بەوەی کە پەرلەمانی کوردستان دەنگ لەسەر کاندیدەکان بدات و هەرکەسێک بەرزترین دەنگی هێنا ببێتە کاندیدی یەکگرتووی هەموو کورد و پاشان پێشکەشی پەرلەمانی فیدراڵ بکرێت.

باسی لەوەشکرد، رێگەیەکی دیکە ئەوەیە کە ئەندامە کوردەکانی ناو پەرلەمانی عێراق، لە قۆناغی یەکەمدا دەنگ بدەن بەو کاندیدانەی کە ئێستا بەردەستن؛ هەرکەسێک زۆرترین دەنگی کوردەکانی ناو پەرلەمانی عێراقی بەدەستهێنا، دەبێتە کاندیدی یەکگرتوو و دواتر بۆ بڕیاری کۆتایی پێشکەشی پەرلەمان دەکرێت، ئەم مێتۆدانە تاکە رێگەن بۆ ئەوەی بە شێوەیەکی دادپەروەرانە سەرۆککۆمار هەڵبژێرن ئەگەر رێککەوتن نەکەن و تا ئێستاش وا دیارە کە نەگەیشتوونەتە رێککەوتن لەگەل پارتەکانی تر.