تەلەفزیۆنی فەرمی سوریا دەڵێت، هێزەكانی سوریای دیموكرات (هەسەدە) و حكومەتی دیمەشق رێككەوتن، كە ئەوەش دەبێتە هۆی راگرتنی هێرشی گروپەكان.
ئەمڕۆ سێشەممە ٢٧ـی کانونی دووەمـی ٢٠٢٦، تەلەفیزیۆنی فەرمی سوریا بڵاویكردەوە، لێکتێگەیشتنێک لەنێوان هێزەكانی سوریای دیموكرات (هەسەدە) و حکومەتی سوریا هاتەئاراوە کە دەبێتە هۆی راگرتنی هێرشە سەربازییەکان و بڵاوبوونەوەی هێزەکانی ئاسایشی ناوخۆ لە حەسەکە، قامیشلۆ و ناوچەکانی دیکە.
تەلەفیزیۆنەكە
لە زاری چاوگە تایبەتەكانەوە دەڵێت، "بەپێی لێکتێگەیشتنەكە، هێزەکانی وەزارەتی
ناوخۆی سوریا لەناو شارەکان و ناوچە گرنگەکانی حەسەکە، قامیشلۆ و ناوچەکانی دیکە بۆ دەستەبەرکردنی
ئاسایش بڵاودەبنەوە".
ئاماژەی بەوەشكردووە،
هێزەكانی هەسەدە لە گوندەکانیان و ئەو ناوچانەی ئێستا لێی جێگیرن، دەمێننەوە و دەستدەکرێت
بە رێوشوێنەکانی تێکەڵکردنی هێزەکانی هەسەدە لەناو دامەزراوەکانی دەوڵەتی سوریادا،
لە چوارچێوەیەکدا کە دواتر وردەکارییەکانی رادەگەیەنرێت.
تەلەفیزیۆنی فەرمی
سوریا دەشڵێت، "لێكتێگەیشتنەكە راگرتنی هەموو هێرشە سەربازییەکان لەسەرجەم بەرەكان
لە خۆدەگرێت و جێبەجێکردنی ڕێککەوتنەکەش لە ماوەی دوو رۆژی داهاتوودا دەستپێدەکات".