ئەو زیندانانەی لەژێر دەسەڵاتی هەسەدەدا بوون کامانەن؟

پاش سەرکەوتن بەسەریاندا، هەسەدە ژمارەیەکی زۆری زیندان و کەمپی لەژێر کۆنترۆڵی خۆیدا هێشتبووەوە ، کە ژمارەی زیندانەکان ٢٦ زیندان بوون، زیاتر لە ١٢ هەزار چەکداری داعشیان تێدابوو و نزیکەی سێ هەزاریان زیندانی بیانی بوون و خەڵکی ٥٤ دەوڵەتی جیاوازبوون، هەروەها دوو کەپمیشی لەژێر دەستابوو کە برتیبوون لە کەمپی هۆڵ و کەمپی رۆژ.

گەورەترین زیندان، زیندانی غوێرانە لە حەسەکە ، کە چوار هەزار و ٥٠٠ دەستبەسەرکراوی تێدایە، هەروەها ئەوانی دیکە بریتین لە:

-زیندانی تەبقە کە نزیکەی دوو هەزار و ٤٠٠ بەندکراوی تێدایە.

- زیندانی رەققە، سەدان بەندکراوی تێدایە.

- زیندانی شەدادی، زیاتر لە هەزاران بەندکراوی تێدا گواستراوەتەوە بۆ عێراق.

-زیندانی عەلایە هەزاران بەندکراوی لەخۆگرتووە.

جگە لە زیندانەکانی جەرکین لە قامیشلۆ، زیندانی دێریک لە مالیکییە و زیندانی کامپی رۆژ.

دوو زیندانی دیکەیان هەیە لە ناو هەردوو کامپی هۆڵ و رۆژدا کە خێزانەکانی داعشیان تێدایە.

- کەمپی رۆژ ٤٠ هەزار کەسی تێدایە.

-کەمپی هۆڵ ٥٤ هەزار کەسی تێدایە.

و دوای ١٢ ساڵ ئەمجارە لەبەردەم هێرشێکی ترە و لەلایەن گروپە چەکدارەکانی سەر بە دیمەشق هێرشی کراوەتە سەر و بە نزیکەی ٪٥٠ـی ناوچەکە داگیرکراوە.

بەهۆی هێرشەکانەوە شارەکانی حەسەکە، قامیشلۆ، کۆبانێ و دەوروبەریان رووبەڕووی شەپۆلێکی نوێی ناسەقامگیری بوونەتەوە. ئەم دۆخە نەک هەر بووەتە هۆی گیانلەدەستدانی ژمارەیەک هاووڵاتی مەدەنی، بەڵکو خزمەتگوزارییە سەرەتاییەکانیشی بە تەواوی پەکخستووە و لە ئێستاشدا مەترسییەکی زۆر هەیە لەسەر لایەنی ئەمنی ناوچەکە بەهۆی ئەو شەڕ و پێکدادانانەی لە دەوروبەری ئەو زیندانانە روودەدەن کە هەزاران چەکداری داعشیان تێدا دەستبەسەرە.

پەلاماری رژێمی سوریا بۆ سەر هەسەدە رەنگە ببێتە هۆی دزەکردنی گروپە چەکدارەکان لە سنوورەکانەوە و چالاکبوونەوەی شانە نووستووەکان لە ناوخۆی عیراق و ناوچەکە، پێویستە لەسەر بەغداد ئاستی هۆشداریی مەترسییەکان لەسەر سنوورە رۆژئاواییەکان بۆ بەرزترین پلە بەرزبکاتەوە، باری نائاسایی هەواڵگری رابگەیەنێت.

فەرماندەیی ناوەندیی ئەمریکا لە نوێترین لێدوانیدا وتی، بە هەماهەنگی لەگەڵ هاوبەشە ناوچەییەکانیان و حکومەتی عێراق دەستیانکردووە بە گواستنەوەی نزیکەی حەوت هەزار دەستگیركراوی داعش لە سوریاوە بۆ عێراق و دوای گواستنەوەیان بۆ عێراق، لە ناوەندی پارێزراودا دەستبەسەردەكرێن

لە رووی جوگرافییەوە، رۆژئاوای کوردستان پێچەوانەی بەشەکانی دیکەی کوردستانە و ناوچەیەکی شاخاوی نییە، بۆ هەر سوپایەکی پۆشتە و تەیار و خاوەنی چەک و تەکنەلۆژیای سەربازی پێشکەوتوو ئاسانە هێرشی بکاتە سەر.