نوێنەری ترەمپ لە عێراق، دڵنیای دەدات کە پشتیوانی هەرێمە و هەڕەشە لە گروپە چەکدارەکان دەکات و دەڵێت، ئەم وڵاتە شوێنی ئەوانی تیانابێتەوە.
ئەمڕۆ پێنجشەممە ٢٧ـی تشرینی دووەمی ٢٠٢٥، مارک ساڤایا، نوێنەری تایبەتی سەرۆکی ئەمەریکا لە عێراق لە بڵاوکراوەیەکدا دەڵێت، گروپە چەکدارەکان کە بە شێوەیەکی نایاسایی و بە ئەجێندای بیانی دوژمنکارانە دەجووڵێن، دوێنێ هێرشێکیان بۆ سەر کێڵگەی غازی کۆرمۆر ئەنجامدا.
وتیشی، پێویستە حکومەتی عێراق ئەو
کەسانە دەستنیشان بکات کە بەرپرسیارن لەم هێرشە و دادگاییان بکات و لە عێراقێکی سەروەردا
جێگەی ئەو جۆرە گروپە چەکدارانە نییە.
ئاماژەی بەوەشکرد، ئەمەریکا بە تەواوی پاڵپشتی ئەم هەوڵانە دەکات و
بە پێویستی دەزانێت بەدواداچون بۆ هەموو ئەو گروپە نایاساییانە بکرێت و
لێپرسینەوەیان لەگەڵ بکرێت و ئەمریکا پشتیوانی لە کوردستانێکی بەهێز دەکات لە
چوارچێوەی عێراقێکی یەکگرتوو و سەقامگیردا.
هەروەها هانی بەغدا و هەولێر دەدات کە هاوکارییە
ئەمنییەکانیان قووڵتر بکەنەوە و لە نزیکەوە کار بکەن بۆ پاراستنی ژێرخانی ئابووری
و وزە و ئەمەریکا پابەندبوونی پتەوی خۆی بۆ هاوکاریکردنی حکومەتی عێراق لە
بەرزکردنەوەی تواناکانی بەرگری و بنیاتنانی هێزە نیشتمانییەکانی دووپاتدەکاتەوە.