PM:10:10:21/09/2025
500 جار خوێندراوەتەوە
بازرگانی هەرێم دەڵێت، ٧٠٠ هەزار هاوڵاتی بەهۆی پڕنەكردنەوەی پسووڵەی ئەلیكترۆنیی خۆراك، بەشە ئارد و خۆراكیان پێ نادرێت.
ئەمڕۆ یەكشەممە ٢١ـی ئەیلولی ٢٠٢٥، نەوزاد كامیل، بەڕێوەبەری گشتی بازرگانی هەرێم دەڵێت، ئاگادار كراونەتەوە و رێكارەكانی دابەشكردنی بەشەخۆراكی شەشەمی ئەمساڵ دەستیپێكرد.
وتیشی،
"هەندێك لە زەیت و دۆشاو كەمە، بەڵام رۆژانە شەكر و برنج و پاقلەمەنییەكان بۆ
كۆگاكانمان دێت، زەیت و دۆشاوەكەش بۆمان دێت و دەست بە دابەشكردنی دەكرێت".
ئاماژەی
بەوەشکرد، بڕیاری دابەشكردنی بەشەئاردی هەشتەمی ئەمساڵی هاوڵاتییانیش دەرچووە و
دەست بە دابەشكردنی كراوە.
باسی لەوەشکرد،
بەشەخۆراكی شەشەم پێكهاتووە لە برنج سێ كیلۆ، شەكر كیلۆیەك، زەیت لیترێك، ٤٠٠ گرام
دۆشاوی تەماتە و كیلۆیەك لە پاقلەمەنییەكان.
ئەوەشی خستەڕوو،
بۆ ئاردیش بڕی نۆ كیلۆ ئارد دەدرێتە هەر هاووڵاتییەك و ئاردەكەش دوای تاقیكردنەوە
دابەش دەكرێت.
دەشڵێت، زیاتر
لە ٧٠٠ هەزار هاوڵاتیی هەرێمی كوردستان بەهۆی پڕنەكردنەوەی پسووڵەی ئەلیكترۆنیی
خۆراك، بەشەئارد و خۆراكی نوێیان پێ نادرێت.
