میدیای فەرمیی سوریا دەڵێت، ئیسرائیل دەورووبەری ناوەندێکی توێژینەوەی زانستی لە دیمەشق و ناوچەیەکی دیکەی لە حەما لە ناوەڕاستی سوریا کردووەتە ئامانج.
ئەمڕۆ چوارشەممە ٢ـی نیسانی ٢٠٢٥، ئاژانسی هەواڵی فەرمیی سوریا "سانا" بڵاویکردەوە، فڕۆکە جەنگییەکانی ئیسرائیل بە ئاسمانی سوریادا دەسوڕێنەوە و چەند شوێنێکیان بۆردومان کردووە، دەنگی چەند تەقینەوەیەکی گەورەش بیستراون.
ئاژانسەکە ئاماژەی بەوەکرد، فڕۆکە جەنگییەکانی
ئیسرائیل ناوەندێکی لێکۆڵینەوەی زانستییان لە گەڕەکی مەساکن بەرەزە لە دیمەشق بۆمباران
کردووە، تەقینەوەیەکی گەورەش لە ناوەندەکەدا
روویداوە.
بە پێی ئاژانسەکە، فڕۆکەکان تەنها بۆمبارانی
دیمەشقیان نەکردووە، بەڵکو فڕۆکەخانەی سەربازیی حەما و دەورووبەری فڕۆکەخانەی T4ـی
سەربازیی لە حمسیش بۆمباران کردووە.
ئەمەش لە کاتێکدایە، ئیسرائیل لە سەردەمی
دەسەڵاتی بەشار ئەسەد، سەرۆکی پێشووی سوریادا، چەند جارێک ئەو شوێنانەی کە ئەمڕۆ بۆمبارانی
کردوون، ئەو کاتیش بۆمبارانی دەکرد، چونکە وەک خۆیان ئاماژەیان پێ دەکەن، لە رێگەی
ئەو دامەزراوە سەربازییانە چەک و پێداویستی جەنگی بۆ حزبوڵڵای لوبنانی دەگوازرایەوە.