سوپاى ئیسرائیل ئاماژەی بەوەش کردووە، لە ماوەى هێرشەکانیان بۆ سەر کەرتى غەززە، چوار هەزار و ٧٠٠ دەروازەى تونێل دۆزراونەتەوە، هەزار شوێنى هەڵدانى موشەک و ٤٠ هەزار ئامانجى دیکەیان بۆردوومان کردووە.

لە بەرامبەردا میدیاکانى فەڵەستین بڵاویان کردەوە، لە ماوەى یەک ساڵى رابردوودا زیاتر لە ٤١ هەزار فەڵەستینى کوژراون و ٩٧ هەزارى دیکەش بریندار بوون کە زۆرینەیان ژن و منداڵن.

لە دوای یەک ساڵ و لە بارەی مەترسییەکانی فراوانبوونی ئاگری شەڕەکە، وڵاتان هەوڵەکانیان بۆ راگرتنى جەنگە خوێناوییەکە دەدەن و دەیانەوێت ناوچەکانى دیکەی رۆژهەڵاتی ناوەڕاست بە پریشکی ئاگرى جەنگەکە نەسوتێت.

جەنگی نێوان ئیسرائیل و غەززە سەرەڕای زیانە مرۆییەکەی، زیانێکی ئابووری و ژینگەیی زۆریشی بەدوای خۆیدا هێناوە.

ئەگەر چی کاردانەوە جیهانییەکان بۆ راگەیاندنی ئاگربەست بەردەوامە و وڵاتان داوای راگرتنی جەنگ دەکەن، بەڵام هێشتا ئاگری جەنگ لە کڵپەدایە.

بەیانی ئەمڕۆش کامالا هاریس، جێگرى سەرۆکی ئەمریکا و کاندیدی دیموکراتەکان بۆ پۆستی سەرۆکایەتى رایگەیاند، بەردەوام دەبێت لە فشار خستنەسەر ئیسرائیل بۆ راگرتنی شەر، ئیمانوێل ماکرۆن سەرۆکی فەرەنساش داوای لە سەرۆک وەزیرانی ئیسرائیل کردووە ئاگربەست لە غەززە و لوبنان رابگەیەنێت.