لایخۆشییەوە بەرپرسێکی ئەمریکی بە ئاژانسی فرانس پرێسی راگەیاند، گفتوگۆکانی ئاگربەستی غەززە لە دوێنێوە لە قاهیرە دەستی پێکردووەتەوە و ئەمڕۆش لە دەوحە بەردەوام بووە و برێت مەکگۆرک راوێژکاری جۆ بایدن لە رۆژهەڵاتی ناوەڕاست ئامادەی گفتوگۆکانی ئاگربەست بووە.

پاش ئەوەی دوو هەفتە لەمەوبەر هەوڵەکان بۆ ئاگربەستی حەماس و ئیسرائیل بە نێوەندگیری ئەمریکا و قەتەر و میسر لە دەوحەی پایتەختی قەتەر شکستی هێنا، هیواکان لەسەر گەڕی دووەمی دانوساندنەکان هەڵچنران و کۆبوونەوەکانیش لە دەوحەوە گواسترانەوە بۆ قاهیرە، بەڵام هیواکان پوکانەوە و شاندەکانی حەماس و ئیسرائیل بەبێ رێککەوتن میسریان بەجێهێشت.

بەپێی ئەو سەرچاوانەی رۆیتەرز دەستیکەوتووە، خاڵی سەرەکی ناکۆکییەکان لەسەر رێرەوی نتساریم و فیلادلفایە کە ناسراوە بە (سەڵاحەدین) بەهۆی ئەوەی ئیسرائیل هێزێکی زۆری گواستووەتەوە بۆ ئەو ناوچانە و باشور و باکوری ‌غەززەی کردووە بە دوو بەشەوە، حەماسیش داوای کشانەوەی ئەو هێزانە دەکات و ئیسرائیلیش رەتیدەکاتەوە و دەڵێت لە دەروازەی ڕەفەح و ڕێڕەوی فیلادلفیا و نەتساریم ناکشێینەوە.

ئەوەش لە کاتێکدایە، ئاگری شەڕ زیاتر لە ١٠ مانگە لە غەززە دەچێت بە ئاسماندا و بەهۆیەوە بە ملیۆنان هاوڵاتی ئاوارە بوون و زیاتر لە ٤٠ هەزار کەسیش کوژراون، هیواکانیش بۆ کۆتایی شەڕەکە بە نادیاری ماوەتەوە.