ئەوەشی خستە روو، سەرجەم هاوکارییە مرۆییەکانی نەتەوە یەکگرتووەکان بە ناچاری راگیراون و کارمەندەکانیان لە شوێنەکانی خۆیان نەماون.

ئەمەش لە دوای ئەوە دێت، چەند رۆژێک لەمەوبەر، سوپای ئیسرائیل ئاگاداری ئەو کەسانەی کردەوە کە لە دیر ئەلبلح نیشتەجێن ناوچەکە چۆڵ بکەن و بڕۆن بۆ رەفەح و دواتر ناوچەکەی بە چڕی بۆردوومان کرد.

لەبارەی هەوڵەکانی ئاگربەستیشەوە پێشتر، ئاژانسی رۆیتەرز لە زاری دوو بەرپرسی باڵای میسرەوە رایگەیاند، نە حەماس و نە ئیسرائیل لەسەر زۆرێک لەو چارەسەرانە نەگەیشتنە رێککەوتن کە نێوەندگیرەکان پێشکەشیان کردبوو.

بەپێی ئەو سەرچاوانەی رۆیتەرز دەستیکەوتووە، خاڵی سەرەکی ناکۆکییەکان لەسەر رێرەوی نتساریم و فیلادلفایە کە ناسراوە بە (سەڵاحەدین) بەهۆی ئەوەی ئیسرائیل هێزێکی زۆری گواستووەتەوە بۆ ئەو ناوچانە و باشور و باکوری ‌غەززەی کردووە بە دوو بەشەوە، حەماسیش داوای کشانەوەی ئەو هێزانە دەکات و ئیسرائیلیش رەتیدەکاتەوە و دەڵێت لە دەروازەی ڕەفەح و ڕێڕەوی فیلادلفیا و نەتساریم ناکشێینەوە.

ئەوەش لە کاتێکدایە، ئاگری شەڕ زیاتر لە ١٠ مانگە لە غەززە دەچێت بە ئاسماندا و بەهۆیەوە بە ملیۆنان هاوڵاتی ئاوارە بوون و زیاتر لە ٤٠ هەزار کەسیش کوژراون، هیواکانیش بۆ کۆتایی شەڕەکە بە نادیاری ماوەتەوە.