PM:12:25:11/02/2024
2656 جار خوێندراوەتەوە
پەرلەمانتارێکی نەوەی نوێ لەناو خۆپیشاندانەکانەوە لە رانیە رایگەیاند، بەردەوام دەبن لە پشتیوانیکردنی مامۆستایان و مووچەخۆران بۆ داواکردنی مافەکانیان، چونکە ئەم دەسەڵاتە زوڵم لە میللەت دەکات و سەرەڕای فرۆشتنی ٢٥٠ هەزار بەرمیل نەوت رۆژانە و داهاتی ناوخۆ و وەرگرتنی باج لە هاوڵاتییان، مووچەی مووچەخۆرانیش دەدزێت.
ئەمڕۆ یەکشەممە، مژدە مەحمود پەرلەمانتاری خولی پێنجەمی پەرلەمانی کوردستان لە فراکسیۆنی نەوەی نوێ رایگەیاند، بەردەوام دەبن لە پشتگیریکردنی خۆپیشاندەران و پێویستە ئەم خۆپیشاندانانە فراوانتر بکرێن.
ئەوەشی
خستە روو، ئەم دەسەڵاتە زوڵم لە میللەتی خۆی دەکات، چونکە رۆژانە ٢٥٠ هەزار بەرمیل
نەوت دەفرۆشێت و هەروەها سەرەڕای هەبوونی داهاتی ناوخۆ و وەرگرتنی زیاتر لە ٤٠٠ جۆر
باج لە هاوڵاتییان، بەڵام مووچەی مووچەخۆران و فەرمانبەران دەدزێت.
باسی لەوەش
کرد، "حکومەتی کاربەڕێکەر بەغدا تۆمەتبار دەکات بە نەناردنی مووچەی مووچەخۆران
و بۆ نەوت و مووچە روو لە بەغدا دەکات کەواتە ئەم حکومەتە خۆی کاری چیە؟".
ماوەی پێنج
مانگە خۆپیشاندانی مامۆستایان و فەرمانبەرانی ناوچە جیاوازەکانی هەرێم بەردەوامە و
لە چەندین ناوچە تاوەکو ئێستا دەست بە پرۆسەی خوێندن نەکراوەتەوە و لە هەندێک ناوچەش
تەنها ماوەی سێ هەفتەیە پۆلی ١٢ و ٩ دەستیان بە خوێندنی وانەکانیان کردووە، کە وەک
خوێندکاران باسی دەکەن، لە یەک وانەدا سێ بۆ چوار بابەتیان بۆ باسدەکرێت و فریای تێگەیشتن
لە بابەتەکان ناکەون. جگە لەوەی ئەو دوو پۆلە تاقیکردنەوەی نیشتیمانیان هەیە.
