ئەوەشی خستەڕوو، "لەماوەی رابردوودا ئەو خۆراکانەی دەنێردران لێی دەدزرا و دەنێردرایە بازاڕەوە و دەفرۆشرا، لەمانگی حەوتی ساڵی ٢٠٢١دا برنجێکی کوالێتی بەرز کە هەر فەردەیەکی ٢٥ کیلۆبوو هەموو هاوڵاتییەک لە حکومەتی عێراقەوە یەک کیلۆ برنجی بە دیاری بۆهاتبوو، بەڵام تەنها لە قۆرەتوو و لەمەیدان و چەند شوێنێکی دەورووبەری ئیدارەی گەرمیان دابەشکرا و دواتر دیارنەماو دزرا.

وتیشی، "هەندێ خۆراکی دیکەش کە بەڵگەم لایە نێردراوە و سەرەڕای ئەوەی چەندین مانگیش بەسەر هاتنیدا تێپەڕیووە بەڵام دابەشنەکراوە."

موسەنا ئەمین ئاماژەی بەوەشکرد، ئەو گرێبەستانەی بۆ خۆراکی هاوڵاتیان دەکرێن یەکێکن لە خراپترین گرێبەستەکان کە تیایدا گەندەڵی بەرفراوان و قۆرخکاری هەیە و بۆ وەزارەتی بازرگانی عێراق دەگەڕێتەوە.

باسی لەوەشکرد، بە وەزیری تەندرووستییان وتووە ئاسایشی خۆراک واتە ئاسایشی تەندرووستی هاوڵاتیان و پێشیان وتووە، "هیواداربووین بتوانیت چاکسازی بکەیت، بەڵام بەداخەوە کە وانەبوو، هەر وەزیرێکی دیکەش هاتبێ پێمان وتووە کە ئەم وەزارەتەی ئێوە وەزارەتێکە مافیای تێدایە، مافیای خەتەرناک و مەترسیدار و دزی گەورە کە یاری بە قووتی خەڵکەوە دەکەن."

سەبارەت بە دۆخی گەندەڵی عێراق دەڵێت، "عێراق وەک کەلاکێکی لێهاتووە وەکو چۆن دڕندە سەری تێکردبێ و هەریەکە لەلایەکەوە بیخوات، ساڵانە ملیارەها دۆلار بۆ خۆراکی هاوڵاتیان تەرخان دەکرێت و لەم پارەیەش بە سەدان ملیۆن دۆلاری بە دزی لێ دەخورێت و لەوانەیە بەهۆی کەمتەرخەمی دەیان ملیۆنیشی لێ بەهەدەر بڕوات."

ئەوەشی خستەڕوو، چەندین جار پێشنیاریان کردووە لەبری ئەو بەشە خۆراکە پارەی نەقدی بدرێت بەهاوڵاتیان، بەڵام مافیاکانی دەسەڵاتدار و پەیوەست بە فراکسیۆنە گەورەکان ناهێڵن ئەم جۆرە پرۆژانە سەربگرێت، لەبری ئەوەی ئەو پارەیەی دەدرێت بە وەزارەتی بازرگانی و ئەوانیش دەیدەنە کۆمپانیاکان بۆ کڕینی خۆراک زۆربەی هەرە زۆری بەهەدەر دەڕوات، بەڵام ئەگەر بدرێت بە هاوڵاتی ئەوکات بازاڕیش ئازاد دەبێت و دەبوژێتەوە.

سەبارەت بە بڕە پارەی پێشنیارکراو لەبری خۆراک ئەوەی خستەڕوو، "بەلایەنی کەم هەر هاوڵاتییەک نۆ بۆ ١٠ دۆلای لە سەبەتی خۆراک بۆ دابین دەکرێت و ئەمەش بڕە پارەیەکی باشە، یارمەتیدەرێکی ماددی حکومەتبوو بە نیسبەت خەڵکەوە و تێچوویەکی کەمتری دەبوو وەک تێچووی بارکردن و گواستنەوە و داگرتنی بەشەخۆراکی مانگانە."

وتیشی، "ئەگەر بەو شێوەیە بکرایە ئەو کات کار ئاسانییەکی گەورەبوو، کەسیش نەدەهاتە سەر باسی خراپی جۆری خۆراک و گواستنەوە و هەلگرتنی کەزۆرجار تاوانی گەورە کراوە بەرامبەر بەم میللەتە، ئەو خۆراکە بەسەرچووانەی کە هەمووی ڕێککەوتی بەسەرچوونەکەی زۆر زۆر نزیک بووە یان ساختەکاری لە رێککەوتی بەسەرچوونەکەیدا کراوە و خۆراکی ژەهراوی و پیس و ماوە بەسەرچوو دراوە بەخەڵک، یاخود ئەوەی لە کۆگاکانی وڵاتانی دیکەدا فڕێ دەدرێت و بە نیوەی نرخەکەی دەفرۆشرێت و عێراق دەیانکڕێتەوە."

باسی لەوەشکردووە، هەندێکجار خۆراک لەناو بارهەڵگرەکاندا بۆماوەی هەشت رۆژ لەبەر خۆر دەمێنێتەوە و دەڵێت، "ئەمە کارەساتێکی گەورەیە پێویستە داواکاری گشتی بۆ ئەم بابەتە بێتە سەر خەت، چونکە هیچ مەرجێکی تەندرووستی تێدا نییە."

سەبارەت بە کۆگاکانی هەڵگرتنی خۆراک وتی، "کۆگاکانی هەڵگرتنی خۆراک سەرەڕای ئەوەی گەورەن و کارەبایان بۆ دابینکراوە بەڵام بە نەشیاوترین شێوە خۆراکەکانی تێدا هەڵدەگیرێت و راستەوخۆ لەسەر نایلۆنێک دادەنرێت و ئاو بەژێریدا دەڕوات و فێنککەرەوەی تێدانییە و تەنها چەند هەوا گۆڕێکی بچووک بچووکی تێدایە کە لەقەبارەی ئەو کۆگا گەورانەی خۆراکدا نین."