وەزیرەکەی سەدر باسی لەوەشکردووە، سەرۆکوەزیران کە بە کاربەڕێکەر ناوی دەبەن، بێ بودجەیە و پەرلەمان بێ رۆڵە وناتوانێت ئەرکەکانی خۆی جێبەجێ بکات و وەزیرەکان لەنێوان گەندەڵەکان و ستەملێکراواندان بۆیە ئاسایش و پەیوەندییە دیبلۆماسییەکان پەکیان کەوتووە.

دەشڵێت، "سەربەخۆیی و تەندروستی و پەروردە و کشتوکاڵ و پیشەسازی و کار (بێکاری) و رێگەوبان و پرد و فڕۆکەوانی و یاسا هەموو سێکتەرەکان رووبەڕووی وشکبوون بوونەتەوە."

باسی لەوەشکردووە، سەرۆککۆمار دەسەڵاتەکانی لێسەندراوەتەوە و دەسەڵاتی دادوەری لەبەر ترس یاخود تەماح لەبەرامبەر گەندەڵیدا بێدەنگ لەکاتێکدا دزەکردنی دەنگ و ڤیدیۆ بوونی هەیە و هاوتای ئەو یاسایەی دەکات کە لەبەر دزینی کلێنس دەستگیردەکرێن و یاسا لەسەر دەستکورت و کەمدەرامەتەکان جێبەجێ دەکرێت و بەسەر گەندەڵکاراندا جێبەجی ناکرێت.

وتووشیەتی، "ئەو دەستورەی کە داڕێژراوە پەیوەست نییە بە یاساوە و لەسەر ویست و پێوەرەکانی خۆیان دایانڕشتووە و لە رێگەی دەستەی دادوەرییەوە گۆڕانکاری تیادا دەکەن هەر کاتێک لەگەڵ ویستەکانیان یەکنەگرێتەوە."

وەزیرەکەی سەدر ئاماژەی بەوەشکردووە، "دەبێت شکۆی دەوڵەت لە کوێدا بێت کە گەندەڵی و تاوانکاری و ماددەی هۆشبەر و چەک و پەتا (نەخۆشی) و دەستێوەردانی دەرەکی و چەندانی دیکە وڵاتەکەیان کۆنترۆڵکردووە."