نێد پڕایس وتەبێژی وەزارەتی دەرەوەی ئەمریکا لە راگەیەندراوێکدا بەبێ ئەوەی هیچ وردەکارییەکی لەبارەی ناوەڕۆکی وەڵامەکەی ئەمریکاوە بڵاوبکاتەوە رایگەیاند، "لێکۆڵینەوەکانمان لەسەر ئەو پرسە ئەمڕۆ کۆتاییهات و وەڵاممان بۆ یەکێتیی ئەورووپا ناردووە".

ساڵی ۲۰۱٥ رێککەوتننامەی وڵاتانی پێنج کۆ یەک، لە نێوان ئێران و ئەندامە هەمیشەییەکانی نەتەوەیەکگرتووەکان، ئەمریکا، روسیا، چین، بەڕیتانیا، فەڕەنسا و ئەڵمانیا، واژۆ کرا، بەگوێرەی رێککەوتننامەکە لە بەرامبەر هەڵگرتنی سزاکاندا، ئێران بەرنامە ئەتۆمییەکەی رێکدەخاتەوە.

بەڵام لە ساڵی ۲۰۱٨دا سەرۆکی پێشووی ئەمریکا، دۆناڵد ترەمپ، تاکلایەنە لە رێککەوتننامە ئەتۆمییەکە کشایەوە و دووبارە سزاکانی خستەوە سەر ئێران لە بەرامبەریشدا حکومەتی تاران، هەنگاو بە هەنگاو لە جێبەجێکردنی رێککەوتتنامەکە وەستا و دووبارە دەستیکردەوە بە پیتاندنی یۆرانیۆم بە رێژەیەکی بەرز.

بە ئامانجی دووبارە گەڕانەوەی ئەمریکا و زیندووکردنەوەی رێککەوتننامەکە، لە نیسانی ۲۰۲۱دا دانوستانەکانی ڤییەنا دەستیان پێکرد، راگەیەندراوی کۆتایی دانوستانەکانیش لەلایەن یەکێتیی ئەورووپاوە نێردرا بۆ ئێران و ئەمریکا و بەشداربووانی دیکەی دانوستانەکان و دوا بەدوای ئەمەش لایەنەکان بڕیاریاندا بگەنە رێککەوتنی کۆتایی.

وەزارەتی دەرەوەی ئێران له ١٥ی ئابدا بۆچوونەکانی خۆی لەبارەی رەشنووسی رێککەوتنەکە خستەڕوو که لەلایەن یەکێتیی ئەورووپاوه پێشکەش کرابوو و رایگەیاند، چاوەڕوانی وەڵامی ئەمریکا دەکەن سەبارەت بە رەشنووسی دەقەکە.

لەلایەکی دیکەشەوە، جۆزێپ بۆرێل نوێنەری باڵای یەکێتیی ئەورووپا بۆ سیاسەتی دەرەوە و کاروباری ئاسایش، لە راگەیەندراوێکدا سەبارەت بەو بابەتە رایگەیاند، ئەگەر وەڵامێکی ئەرێنی لە ئەمریکاوە وەربگیرێت، دەکرێت لە کۆتایی ئەم هەفتەیەدا رێککەوتنی ئەتۆمی لەگەڵ ئێراندا بکرێت.