بەپێی ئامارەکان لە سەرجەم شارەکاندا ئەنجامدانی هاوسەرگیری روولەزیادبوون بووە و رێگەپێدان بە ژنهێنانی دووەم لە پارێزگای هەولێر زۆرترین رێژە بووە کە ٧٣ رێگەپێدان بووە، بەڵام لە کەرکوک و گەرمیان ئەو رێژەیە سفرە و رێژەی هاوسەرگیریکردن ٢٤٣ مامەڵە کەمتر بووە بەراورد بە ساڵی پێش خۆی؛ لە بەرامبەریشدا رێژەی جیابوونەوە ٥١٥ مامەڵە زیادیکردووە.

بەشێکی شارەزایان و توێژەرانی کۆمەڵایەتی پێیان وایە، هۆکاری زیادبوونی رێژەی جیابوونەوە زۆرە، بەڵام یەکێک لە هۆکارەکان ناسەقامگیری ناوچەکە و خرای دۆخی ئابورییە، کە لەم ساڵانەی کۆتاییدا هەرێمی کوردستان کەوتووەتە ناو دۆخێکی ئابوری سەخت و بێکاری رووی لە زیادبوون کردووە، بەدەر لەوانەش دامەزراندن لە کەرتی گشتیدا نییە و لە کەرتی تایبەتیشدا زۆر جار مافی تەواو بە کارمەند نادرێت.

شارەزایان باس لەوەدەکەن، بەشێکی پرۆسەی هاوسەرگیری سەرکەوتوو پەیوەستە بە ژیانێکی ئارام و دابینکراو و پارێزراو، کە لە زۆر رووەوە لە هەرێمی کوردستان ژیانی تاکەکان بە سەختی بەڕێوەدەچێت و بەدەر لە نەبوونی کار و دۆخی ئابوری؛ ژینگەی گشتی هاندەرە بۆ دروستبوونی فشاری دەروونی لەسەر تاک، بەوەی کەرتە گشتییەکان خزمەتگوزاری پێویست بە هاوڵاتیان نادەن.