وتیشی، ئەگەر حکومەت پێکنەهێنرێت و دۆخەکە وەک خۆی بمێنێتەوە، پەرلەمان و حکومەت بەرەو دەرکردنی یاسای نوێی قەرزکردن هەنگاو دەنێن و تاکە چارەسەر كە لە ئێستادا لە بەردەستدایە قەرزکردنە لە بانکە ناوخۆییەکان و دڵنیایشیدا وڵات خاوەنی سەرچاوەی دارایی پێویستییە.

لەو چوارچێوەیەدا وەزیرێکى حکومەتى عێراق بە ئێن ئاڕ تى وت، رۆژى سێشەممە بۆ مووچەى مانگى سێی هەرێم یەکلاکەرەوەیە و ئەو پرسە لە کۆبوونەوەى ئەنجومەنى وەزیران بڕیارى لەسەر دەدرێت، ئەو بڕیارەش دوای ئەوە هات کە بەپێی زانیارییەکان حکومەتى ماوەبەسەرچوو بە بیانووی کەمیی داهاتەوە داوایکردووە ١٢٠ ملیار دینارەکەی داهاتی ناوخۆ بۆ مانگی سێ رادەستی بەغدا نەکات و داوایانکردووە کەمتر لەو بڕە رادەستبکەن.

بۆ ئەو مەبەستەش تەیف سامی وەزیری دارایی عێراق دوو مەرجى دیاریکردووە بۆ ناردنى مووچە.یەکەمیان، لەلایەن وەزارەتی نەوتەوە راپۆرتێک بۆ دارایی عێراق بنێردرێت کە کێڵگە نەوتییەکانی هەرێم بەهۆی هەبوونی مەترسی لەسەریان ناچاربوون بەرهەمهێنانی نەوت رابگرن و بەوهۆیەوە داهاتیان کەمیکردووە، دووەم مەرجیش ئەوەیە کە بڕیاری ناردنی مووچە بەبێ ناردنی ١٢٠ ملیارەکە، دەبێت بە رەزامەندی و بە بڕیاری ئەنجومەنی وەزیرانی عێراق بێت.

هەرچۆنێک بێت پێویستە لە چەند رۆژی داهاتوودا وەزارەتی نەوت نووسراوەکە بۆ دارایی عێراق بنێرێت، دواجاریش لە کۆبوونەوەی رۆژی سێشەمەدا سودانی بڕیار بدات لەسەر ناردنی مووچەی مووچەخۆران.