یەکێک لە خۆپیشاندەران بە ئێن ئاڕ تی راگەیاند، "بێزاربووین لە حکومڕانیان و لە دزیکردنەکانیان".

وتیشی، "چیدیکە نامانەوێت کەسی دیکە بەهۆکاری خراپی رێگەوبانەوە لەم رێگەیە گیانلەدەستبدات، تەنکەرەکان و بارهەڵگرەکان هاوڵاتیانیان بێزار کردووە".

خۆپیشاندەرێکی دیکە بە ئێن ئاڕ تی راگەیاند، رێگەی سەرەکی نێوان کۆیە – سلێمانی، کۆیە – هەولێر بووەتە قوربانی و پێویستی بەوە هەیە بکرێتە دوو ساید و رۆژانە خەڵکی کۆیە لەو رێگەیە گیان لەدەستدەدات.

ئاماژەی بەوەشدا، ئەوان لەشەوەوە هاتوون رێگەکەیان گرتووە و تا کێشەکانیان چارەسەر نەکەن رێگاکە ناکەنەوە.

یەکێک لە شۆفێرەکان بە ئین ئاڕ تی راگەیاند، خەڵک مافی خۆیەتی خۆپیشاندان بکەن، بەڵام بەڕێوەبەر هاتووە و دەڵێت ئەگەر ئێوەی شۆفێران نەڕۆن ساڵانەکەتان لێوەردەگرین و سزاتان دەدەین، ئەوەی لە کوردستان هەیە لە خەویشدا نایبینرێت.

هاوکات، هاوڵاتییەکە دەکەوێتە گفتوگۆ لەگەڵیدا و بە شۆفێرەکە دەڵێت، کارەکەی ئێوە پارەکەی بۆ هەولێر و خۆڵ و زۆی رێگاکەش بۆ هاوڵاتییانی کۆیەیە.

ئەمە لەکاتێکدایە، کێشەی خراپی رێگەو بانی نێوان شار و قەزاکانی هەرێم یەکێکە لە کێشە کۆنە چارەسەر نەکراوەکانی کابینە یەک لەدوایەکەکانی حکومەتی هەرێم و ساڵانە بەهۆی رووداوەکانی هاتوچۆوە ژامارەیەکی زۆر هاوڵاتی گیانلەدەستدەدەن و بریندار دەبن.