PM:04:32:28/01/2022
23180 جار خوێندراوەتەوە
ئەمڕۆ هەینی پێش بەڕێوەچوونی نوێژی هەینی لە بڵندگۆی مزگەوتی گەورەی شاری کۆیەوە بۆ چەند ساتێک لە بری قورئان گۆرانی لێدراوە و ئەوقافی کۆیە دەڵێت، کێشە لە ئامێرەکان و میمۆرییەکەدا بووە و کاردەکەن تا ئەو کێشانە دووبارە نەبێتەوە.
جەمال عەبدوڵا پێشنوێژ و وتارخوێنی مزگەوتی گەورەی کۆیە بە ئێن ئاڕ تی راگەیاند، "رووداوەکە بەهۆی هەڵەی تەکنیکی میمۆرییەکەوە بووە لە دوای ئەوەی کارگوزاری مزگەوتەکە لە کاتژمێر ١١ و ٣٠ خولەک قورئانی لێداوە و لەدوای تەواوبوونی قورئانەکە چەند وشەیەکی عەرەبەی لێدراوە و دواتریش بە خێرایی لابراوە"، وتیشی، "داوای لێبووردن دەکەین و غەڵەتێکی بەمەبەست نەبووە."
لای خۆیەوە، عەبدوڵا ئەنوەر بەڕێوەبەری ئەوقافی کۆیە بۆ
ئێن ئاڕ تی باسی لەوەکرد، لە ئەنجامی بەدواداچوونەکان بۆیان دەرکەتووە کێشەکە لە
ئامێرەکە و میمۆرییەکەدا بووە.
عەبدوڵا ئەنوەر ئاماژەی بەوەشکرد، کاردەکەن بۆ ئەوەی ئەو کێشانە دووبارە
نەبنەوە و کۆتاییان پێبێت.
لە سنوری قەزای کۆیە نزیکەی ٢٥٠ مزگەوت بوونیان هەیە بەڵام
رێژەی کارمەندیان کەمە و ئەو مزگەوتەی رووداوەکەش تێیدا روویداوە کە مزگەوتی گەورەی
کۆیەیە، سێ کارگوزاریان هەیە و هیچ قورئان خوێنێکی نییە.
