سەردێڕ:

لە ئەوروپاوە بۆ ئاسیا بارانبارین و لافاو و زریانەکان

PM:11:29:25/07/2021

5364 جار خوێندراوەتەوە

لە هەفتەی رابردووەوە تەوژمێکی بارانبارینی بەخوڕ و هەستانی لافاو و گەردەلول بەلجیکا و ئەڵمانیا و چەند وڵاتێکی دیکەی یەکێتی ئەوروپای گرتووەتەوە و بەم دواییەش لە هەریەک لە سعودییە و یەمەن و ئێران و چین لە ئاسیا هەمان رووداو دووبارەبوونەتەوە کە بووەتە هۆی گیانلەدەستدانی چەندین هاوڵاتی و زیانگەیاندن بە ژێرخانی ئابوری و رێگەوبان و زەوی و زاری کشتوکاڵی و بەروو بوومی جوتیاران.


ئەمڕۆ یەکەشەمم، بۆجاری دووەم لەماوەی یەک هەفتەدا بارانبارینی بەخوڕ و زریان و لافاو روویان لە وڵاتی بەلجیکا لە یەکێتی ئەوروپا کردەوە و بەهۆیەوە هەردوو ناوچەی ناومر وبرابانت و والون لە باشوری برۆکسلی پایتەخت زۆرترین زیانیان بەرکەوتووە.

بەهۆی بارانبارین بەخوڕ و هەستانی لافاوەوە زیانێکی زۆر بەو ناوچانە گەیشتووە و چەندین ئۆتۆمبێلی لەگەڵ خۆی ڕاماڵییەوە.

رۆبۆرت کلۆسیت جێگری سەرۆکی شارەوانی ناوچەی برابانت والون رایگەیاند، ئەگەرچی تا ئێستا هیچ زانیاری و وردەکارییەکیان لەبارەی گیانلەدەستدانی هیچ کەسێکەوە بەهۆی لافاوەکەوە پێ نەگەیشتووە، بەڵام لافاوی ئەمجارە لە لافاوی جاری یەکەم زۆرتر و خراپتر بووە.

دەشڵێت، "لێرە ژیاوم و گەورەبووم، بەتەمەنم شتی وام نەبینیوە".

هەر ئەمڕۆ، رۆژنامەی ئەلیتکرۆنی سەبەقی سعودی گرتەیەکی ڤیدیۆیی بڵاوکردەوە تیایدا دەردەکەوێت لە ناوچەی جازان بارانێکی بەخوڕ باریوە و لافاو و هەستاوە و زیانی بە رێگەو بانی ناوچەکە گەیاندووە و چەند ئۆتۆمبێلێک ژێر ئاوکەوتوون.

لە چەند رۆژی رابردوودا، ناوچەی جازان بارانبارینێکی بەخور گرتوویەتییەوە و زیانێکی زۆری بەناوچەکە گەیاندووە.

ئاژانسی هەواڵی فرانس پرێس بڵاویکردەوە، لە خۆرهەڵاتی چین گەردەلولی ئین-فا هەڵیکردووە و بەهۆیەوە گەشتە ئاسمانییەکان و هاتووچۆی شەمەندەفەر و گەشتە دەریاییەکانی پەکخستووە.

پێشبیدەکرێت، گەردەلولی کەمەرەیی لە هەریەک لە شارەکانی نینگبۆ و شەنگەهای بدات کە دوو گەورەترین شاری جیهانین لەسەر کەانری دەریان.

لەشەنگەهای بەهۆی ئەو زریان و گەردەلولە بەهێزەی هەڵیانکردووە سەرجەم گەشتە ئاسمانیەکانی لە هەر دوو فڕۆکەخانە نێودەڵەتییەکەی شارەکە و هاتوچۆی شەمەندەفەر و جوڵەی کەشتییەکانی لە بەندرەکانی شارەکە بەتەواوەتی پەکخستووە.

ئەمە لەکاتێکدایە، لە هەفتەی رابردوو بەهۆی لافاوەوە ٢١٠ لە یەکێتی ئەروپا کە زۆرینەیان لە ئەڵمانیا و بەلجیکابوون گیانیانلەدەستدا. هاوکات، لەچینیش ٥٨ کەس لە ناوچەی هانان بەهۆی لافاوەوە گیانیانلەدەستدا و زیتر لە ٤٩٥ هەزارکەسیش ناچار بە چۆڵکردنی ماڵ و حاڵیان کران.

لە هیندستانیش بەهۆی بارینی بارانی زۆر و هەستانی لافاوەوە ١٢٥ کەس گیانیانلەدەستدا، لەکاتێکدا لە سعودییە سێ ئەندامی یەک خێزان و لە یەمەنیش حەوت کەس بەهۆی لافاوەوە گیانیانلەدەستدا.

کەشناسی عێراقیش رایگەیاندبوو، کە بەهۆی شەپۆلی گەرماوە لە ناوچەکە ئەو بارانبارین و زریانە ناگاتە عێراق.

زانیان و پسپۆرانی بواری کەشناسی و گۆڕانی کەش و هەوا سەرجەم رووداو و کەرەساتەکانی ئەم دواییە دەگەڕێننەوە بۆ ئەو گۆڕانکارییە بەرچاوەی لە کەش و هەوا و پلەکانی گەرمادا روویناداوە و هۆشدارییانداوە لە دووبارەبوونەوەی رووداوەکان و ئەمەش وڵاتان ناچاردەکات خۆیان لەگەڵ دۆخە نوێیەکەدا بگونجێنن.







گەلەری