ئەمڕۆ کوردانی ئێزیدی لە کوردستان و سەرانسەری جیهان جەژنی رۆژووی ئێزیدیی دەگێڕن کە یەکێکە لە پیرۆزترین بۆنە ئایینییەکانی ئێزدییەکان.
ئەمڕۆ هەینی ١٩ـی کاونی یەکەمی ٢٠٢٥، جەژنی رۆژووی ئێزیدییەکانە و پاش سێ رۆژ لە بەڕۆژووبوونی چڕ دێت، وەک هێمایەک بۆ سوپاسگوزاری بەرامبەر خودا و پیرۆزکردنی کورتترین رۆژەکانی ساڵ لە رووی کاتەوە سەیردەکرێت.
ئەم
جەژنە دەکەوێتە هەفتەی دووەمی مانگی کانوونی یەکەم، کە تێیدا بڕوادارانی ئێزدی لە
رۆژانی سێشەممە، چوارشەممە و پێنجشەممەدا بەڕۆژوو دەبن و خۆیان دەپارێزن لە خواردن
و خواردنەوە، و خۆیان لە خوێنڕشتن و شەڕ و قسەی خراپیش دەپارێزن.
لە ئەمڕۆژەدا تەنیا کات بۆ نزا و
پاڕانەوە لە سوڵتان ئێزی تەرخان دەکرێت، کە بەپێی ئایینەکە وەک نوێنەری خودا لەسەر
زەوی و پارێزەری گەردوون سەیردەکرێت و هەموو جۆرە کارێکی رۆژانە رادەگیرێت .
لەگەڵ هاتنی جەژنەکە
رێوڕەسمەکان بە سەردانی مەزارگە پیرۆزەکان و گۆڕستانەکان لە بەیانییەکی زوودا
دەستپێدەکەن و ئێزیدییەکان ئەم رۆژە تەنها بۆ خۆشی نابینن و بەڵکو وەک دەرفەتێک
دەیبینن بۆ ئاشتکردنەوەی ئەو کەسانەی لەیەک زوویرن و بەپێی نەریتە ئاینییەکانیان
هیچ جەژنێک بەبێ ئاشتبوونەوە و لێبوردنیان لە یەکتری تەواو نابێت.