ئاماژە بەوەش کراوە، تا ئێستا ٤٣ هەزار و ٣٩١ کەس لە کەرتی غەززە گیانیان لەدەستداوە و ١٠٢ هەزار و ٣٤٧ کەسی دیکەش بریندار بوون.

باس لەوەش کراوە، جگە لە بەرزبوونەوەی ئاماری گیانلەدەستدان و برینداربوون، هێشتا ژمارەیەک تەرم لەژێر داروپەردوی باڵەخانە رووخاوەکاندا ماون و دەرنەهێندراونەتەوە. 

دوێنێش، چاوگێک لە تەندروستی فەڵەستینەوە بە میدیا عەرەبییەکانی راگەیاند، ئیسرائیل رێگری کردووە لە گەشتنی سێ هەزار و ٨٠٠ بارهەڵگری هاوکاری و بەهۆی نەگەشتنی ئەو هاوکارییانەوە ٤٠٠ هەزار فەڵەستینی لە برسێتیدا دەژین.

ئەوەشی خستە روو، ئیسرائیل لە باکووری غەززە ئەو فەڵەستینیانە بە ئامانج دەگرێت کە نایانەوێت ماڵەکانیان چۆڵ بکەن و بۆردوومانی نەخۆشخانە و ژێرخانی ناوچەکە دەکات.

جەنگی غەززە لە ٧ـی ئۆکتۆبەری ساڵی رابردووەوە سەری هەڵداوە و تا ئێستاش درێژەی هەیە، جەنگەکە دوای ئەوە دروستبوو کە بزوتنەوەی حەماس بە پێنج هەزار مووشەک هێرشی کردە سەر ئیسرائیل و لەو کاتەوە بڵێسەی ئاگری جەنگی نێوانیان پەرە دەسەنێت.

لە جەنگی غەززەدا سەرەڕای هەموو زیانەکانی؛ دۆخی تەندروستی لە وڵاتەکەدا بە جۆرێک خراپە، چەندین نەخۆشی و بەتایبەتیش نەخۆشی پێست بڵاوبوونەتەوە و منداڵانیش قوربانی یەکەمی جەنگەکەن.

سەرەڕای هۆشداری وڵاتان و هەوڵەکانیان بۆ راگەیاندنی ئاگربەست و راگرتنی جەنگ، بەڵام هێشتا هیچ ئومێدێک بە راگرتنی جەنگ نییە و هێرشەکانی ئیسرائیل پەلی هاویشتووە بۆ لوبنان و سوریا و ئیرانیش.