ترەمپ لە پۆستێکیدا لە پلاتفۆرمی "Truth Social " ئاماژەی بەوە کردووە، دوای ئەنجامدانی دوو دیبەیت لەگەڵ جۆو بایدن سەرۆکی ئەمریکا و کامالا هاریسی کاندیدی دیموکراتەکان بۆ پۆستی سەرۆکی ئەمریکا، "دیبەیتی سێیەم بوونی نییە".

ئەوەش لەکاتێکدایە، بەرەبەیانی ١١ـی ئەم مانگە، لە ناوەندی دەستوری نیشتیمانیی فیلادلفیا یەکەم دیبەیتی نێوان ترەمپ و کامالا بەڕێوەچوو، لە دیبەیتەکەدا گفتوگۆ لەسەر هەریەک لە پرسەکانی کۆچبەران، جەنگ، قەرزەکان و ئابووری، یاسای لەباربردنی منداڵ و پلانەکانی داهاتووی وڵاتەکە و چەندین پرسی دیکە کرا، هەردوولا بە چەندین شێوە تۆمەتیان رووبەڕووی یەکتر کردەوە و بەرگریان لە خۆیان کرد.

ئەو دیبەیتە لەلایەن کەناڵی 'ئەی بی سی نیوز'ی ئەمریکی رێکخرابوو و دوابەودوای دیبەیتەکەش تیمەکەی هاریس داوای ئەنجامدانی دیبیتێکی دیکەیان لە تیمەکەی ترەمپ کرد کە بڕیار بوو لە ٢٥ـی ئەم مانگە بەڕێوە بچێت.

بڕیارە لە مانگی ١١ی ئەمساڵدا هەڵبژاردنی سەرۆکایەتی ئەمریکا بەڕێوەبچێت و پێشبڕکێی نێوان کامالا هاریس و دۆناڵد ترەمپیش بۆ ئەو پۆستە لە لوتکەدایە و بەردەوام جێگای مشتومڕی میدیاکانە.

کامالا یەکەم ژنە رەشپێستە کە کاندید بێت بۆ پۆستی سەرۆکایەتی ئەمریکا و تاوەکو ئەم ساتەش توانیویەتی بەرێژەیەکی بەرچاو پشتگیری بۆخۆی کۆبکاتەوە.

ئەوە جگە لەوەی یەکەم ژنە رەشپێست بوو ببێتە جێگری سەرۆکی ئەمریکا و لە خولی پێشووی سەرۆکایەتیدا جێگری جۆو بایدنی سەرۆک بوو.