هەرێم کەمال ئاغا باسی لەوەشکردووە، چوارچێوه‌ی هه‌ماهه‌نگی داوادەکەن کورد ئه‌م له‌دوای جه‌ژن رێکبکه‌ون له‌سه‌ر پرسی سه‌رۆک کۆمار ئایا به‌تیمی هاوبه‌ش بێت یان به‌جیا به ‌هه‌ر شێوه‌یه‌ک له‌شێوه‌کان و ئه‌م قۆناغه‌ هه‌ستیاره‌ ده‌بێت تێیپەڕێنن له ‌پێناو به‌رژه‌وه‌ندییه‌کان و قوربانییه‌کانی کورد و ده‌سته‌به‌رکردنی داخوازییه‌کانمان بە جۆرێک کورد زەرەرمەند نەبێت.

هەرێم کەمال ئاغا ئەوەشی خستووەتەڕوو، دوای کشانه‌وه‌ی ره‌وتی سه‌در گفتوگۆکانی به‌غداد بۆ پێکهێنانی حکومه‌تی داهاتوو گه‌رمتر بوون، و چوارچیوەی هەماهەنیش لە گەورەترین کوتلەی شیعەن دەیانوێت کورد بە زوترین کات رێکبکەوێت وەک چۆن شیعە رێککەوتووە.

جەختیشی کردووە، هه‌تا ئێستا وەفدی یه‌کێتی و پارتی به‌جیا له‌به‌غداد بووه‌ و به‌جیا گفتوگۆ کراوه‌ و به‌جیاش بۆ سه‌رۆککۆمار کاندیدیان هه‌یه‌ هه‌تا ئێستا یه‌کێتی نیشتیمانی کوردستان سووره‌ له‌سه‌ر کاندیده‌که‌ی خۆی که‌ به‌رهه‌م ساڵحە بۆ سه‌رۆک کۆمار و ئەگەر بارودۆخەکە ئاوا بەردەوامبێت وەک ساڵی ٢٠١٨ یەکێتی و پارتی به ‌دوو کاندیدی جیا به‌شداری پرۆسه‌ی هه‌ڵبژاردنی سه‌رۆکی کۆمار له‌ئه‌نجوومه‌نی نوێنه‌رانی عێراق دەکەن.

لەبارەی پرسی کۆبوونەوەکانی یەکیتی و پارتییەوە، ئەوەشی خستەڕوو مانگی رابردوو سەرۆکی هەرێم سەردانی سلێمانی کرد و جگە لە یەکێتی نیشتمانی کوردستان لە گەڵ لایەنەکانی تر کۆبووەوە بە پێی لێدوانی بەرپرسانی پارتی مەبەستی سەردانەکە بۆ یەکخستنی دەنگی کوردە بە تایبەت نێوانی پارتی و یەکێتی لەسەر پرسی بەغداد و پۆستی سەرۆک کۆماری عێراق.

لەبارەی ئەنجامی ئەو گفتوگۆ و کۆبونەوانە هەرێم کەمال ئاغا وتی، "له‌ راستیدا ئه‌وه‌ی سه‌رۆکی هه‌رێم له‌ چوارچێوه‌ی سه‌ردانه‌کانی بۆ سلێمانی و گفتوگۆکان له‌گه‌ڵ لایه‌نه‌ سیاسیه‌کان زیاتر بۆ ره‌وشی هه‌رێمی کوردستان بوو، بێگومان رێککه‌وتن له‌سه‌ر کۆمه‌ڵێک پرسی گرنگ له‌ هه‌رێمی کوردستان وەک هه‌ڵبژادن و نزیکبوونه‌وه‌ی تیمی به‌شداری حکومه‌ت که‌ یه‌کێتی و پارتی و گۆڕان و لایه‌نه‌ سیاسیه‌کانی تریش بۆ هه‌ڵبژاردنی داهاتووی هه‌رێمی کوردستان که‌ وابڕیار بوو ئه‌مساڵ له‌مانگی ١١دا بکرێت و ره‌وشی هه‌رێمی کوردستان له‌چوارچێوه‌ی ئه‌م گفتوگۆیانه‌ بێگومان مه‌سه‌له‌ی سه‌رۆک کۆماریش پرسیک بووە به‌ڵام پرسی سه‌ره‌کی نه‌بووه‌ له‌سه‌ردانه‌که‌ی به‌ڕێز سه‌رۆکی هه‌رێم بۆ سلێمانی .

راشیگەیاند، " ئه‌وه‌ی که‌ ده‌مێنێته‌وه‌ له‌و چه‌ند رۆژه‌ی داهاتوو ئایا یه‌کێتی و پارتی ده‌توانن ئه‌م قۆناغه‌ تێپه‌ڕێنن به‌ رێککه‌وتن و به‌ قۆناغێک بێت که‌ هه‌م کورد بتوانێت له‌چوارچێوه‌ی به‌شداری له‌ حکومه‌تێک که ‌له‌سه‌ر کارنامه‌ی به‌رنامه‌ی حکومه‌ته‌که‌ ده‌نگی هه‌بێت و ره‌نگی هه‌بێت، و کۆمه‌ڵێک پرسی گرنگ هه‌یه‌ وەک پرسی ئابوری کوردستان و پرسی نه‌وت و پرسی هێزی پێشمه‌رگه‌ و ناوچه‌ی کێشه‌له‌سه‌ره‌کان و چۆن هه‌رێمی کوردستان وه‌کو به‌شداربوویه‌کی راسته‌قینه‌ له‌ حکومه‌تی داهاتووی عێراقداسه‌نگی هه‌بێت، بۆئه‌وه‌ی هاوسه‌نگیه‌ک له‌کۆی دامه‌زراوه‌ی ده‌وڵه‌تدا هه‌بێت. "

سەرۆکی فراکسیۆنی یەکێتی لە پەرلەمانی ئەوەشی خستەڕوو، ریککەوتنی یەکێتی و پارتی هیوای هه‌موو لایه‌که و خه‌ڵکی کوردستان به‌گشتی ئەوەیان دەوێت و دۆسته‌کانی کورد له ‌ده‌ره‌وه‌ و له‌ناوه‌وه‌ ئه‌مه‌ ده‌خوازێت که‌ کورد ئه‌م قۆناغه‌ تێپه‌ڕێنێت به‌تایبه‌تی نێوان یه‌کێتی و پارتی به‌ قازانجی کورد و به‌رژه‌وه‌ندیه‌کانی کوردستانە ئه‌م قۆناغه‌ تێپه‌ڕێت.