یانس ستۆڵتنبێرگی سکرتێری گشتی ناتۆ شەوی رابردوو رایگەیاند، تورکیا دەستبەرداری ڤیتۆکەی بووە لەبەرامبەر سوید و فیلاند و رێککەوتنێک لە نێوانیان واژووکراوە و دواتریش راگەیەندراوێکی سێقۆڵی هاوەبەشیان بڵاوکردەوە.
ئەمەش لەدوای ئەوە هات، کۆبوونەوەیەکی چوار قۆڵی لەنێوان یانس ستۆلتنبێرگ سکرتێرى گشتی ناتۆ و سائولى نینیستۆ سەرۆکۆمارى فینلاند و ماگدالینا ئاندرسۆن سەرۆکوەزیرانى سوید و رەجەب تەیب ئەردۆغان سەرکۆمارى تورکیا کرا و دواتریش یاداشتنامەیەکیان واژووکرد.
ئاژانسی ئەنادۆڵی تورکی دەڵێت، بەگوێرەی
یاداشتنامەکە، سووید و فینلاند قایلبوون و بەڵێنیان بە تورکیاداوە رێگریى له
چالاکییه‌کانى پارتی کرێکارانی کوردستان و سه‌رجه‌م رێکخراوه‌کانی دیکە بکەن کە
تورکیا بە کاری تیرۆری لەقەڵەمیان دەدات و هەموو کەسێک پەیوەندیدار بێت بەو بابەتانەوە.
هاوکات، تورکیا داوای کردووە سوید و فینلاند
ئیدانه‌ى هێرشى تیرۆریستیی سه‌رجه‌م ئه‌و رێکخراوه تیرۆریستانه بکەن که له به‌رامبه‌ر
تورکیادا چالاکی ئەنجام دەدەن.
لەسەر هەردوو وڵاتەکە پێویستە، لێکۆڵینه‌وه
له چالاکییه‌کانى کۆکردنه‌وه‌ى پاره و دۆزینه‌وه‌ى ئه‌ندام بۆ په‌که‌که و سه‌رجه‌م
پارت و رێکخراوەکانی دیکەیان بکەن و قەدەغەیان بکەن.
هەر بە گوێرەی ئاژانسەکە لە یاداشتنامەکەدا
هاتووە، فینلاند و سوید لە سۆنگەی به‌ڵگه و زانیارییه هه‌واڵگرییه‌کانى تورکیا،
خێرا کار له‌سه‌ر دیپۆرتکردنى گومانلێکراوانى تیرۆر یان راده‌ستکردنه‌وه‌یان ده‌که‌ن.
"یاداشتنامەى سێقۆلى" ناوی ئەو یاداشتنامەیەیە
کە لەنێوان سوید و فینلاند و تورکیا شەوی رابردوو ٢٨ی حوزەیران واژووکرا کە لە
دواى کۆبوونەوە چوار قۆلییەکەى ناوەندى کۆنگرەى IFEMA لە
مەدرید کە لوتکەى ناتۆى تێدا ئەنجامدەدرێت ئامادەکرابوو.
دواى واژۆکردنى "یاداشتنامەى سێقۆلى"
نێوان تورکیا، سوید و فینلاند راگەیەندراوێکى سێقۆلیى هاوبەش بڵاوکرایەوە.
هەر بە گوێرەی راگەیەندراوەکەدا، لەبارامبەر
هەموو ئەوانەدا تورکیا پشتیوانی له سیاسه‌تى ده‌رگاى کراوه‌ى ناتۆ ده‌کات و پشتیوانى
خۆى له لوتکه‌ى مه‌درید بۆ بانگهێستکردنی سوید و فینلاند بۆ ئه‌ندامێتى له ناتۆ
ده‌کات و تێیدا هاتووە: "فینلاند و سوید وه‌ک هاوپه‌یمانى داهاتووى ناتۆ، پشتیوانى
له په‌یه‌ده/یه‌په‌گه و ئه‌و رێکخراوه ناکه‌ن که له تورکیا به فه‌تۆ
ناسراوه".
باس لەوەشکراوە، سوید ئه‌وه پشتڕاست ده‌کاته‌وه
که له ١ى ته‌مووزەوە یاسایه‌کى نوێ و کاریگه‌رترى به‌ره‌نگاربوونه‌وه‌ى تیرۆر ده‌خاته
بوارى جێبه‌جێکردنه‌وه. ئیتر تورکیا، فینلاند و سوید پشتڕاستى ئه‌وه ده‌که‌نه‌وه
که هیچ گه‌ماڕۆیه‌کى چه‌کى نیشتمانى له نێوانیاندا نه‌ماوه.
ل.ل